माओवादी केन्द्रको स्थायी समिति बैठकः प्रचण्डको एजेन्डामाथि धारणा राख्दै नेताहरु

काठमाण्डू, १८ साउन– प्रमुख प्रतिपक्षी दल नेकपा माओवादी केन्द्रको स्थायी समितिको बैठक आज तेश्रो दिन पनि केन्द्रीय कार्यालय पेरिस डाँडामा जारी छ ।

१६ साउन देखि सुरु भएको माओवादी स्थायी समितिको बैठकमा पूर्व प्रधानमन्त्री एवं पार्टी अध्यक्ष पुष्पकमल दाहाल प्रचण्डले पेस गरेको एजेन्डामाथि नेताहरूले आ–आफ्ना धारणा राख्ने क्रम जारी छ ।

शनिबार बसेको बैठकमा पदाधिकारी, अनुशासन आयोग र स्थायी समिति सदस्य गरी २५ जनाले धारणा राखेका थिए । आज बाँकी पदाधिकारीहरूले धारणा राख्ने प्रवक्ता अग्निप्रसाद सापकोटाले जानकारी दिएका छन ।

बैठकको पहिलो दिन अध्यक्ष प्रचण्डले वर्तमान परिस्थितिबारेमा ब्रिफिङ गरेका थिए । एजेन्डाका रूपमा मध्य पहाडी केन्द्रित अभियानलाई निरन्तरता दिने, केन्द्रीय समितिको बैठकबारे मिति तय गर्ने, समाजवादी मोर्चालाई थप विस्तार गर्ने, सङ्गठन निर्माण, कार्यविभाजन र आन्तरिक एकतालाई सुदृढीकरण गर्ने, बाढी पहिरो जस्ता प्राकृतिक प्रकोप, संसदमा विचाराधीन विधेयक, जनजीविका लगायत समसामयिक प्रस्ताव तयारसम्बन्धी एजेन्डा उनले पेस गरेका थिए ।