- आइतबार, १४ असार, २०८३
काठमाण्डू, १३ साउन– नेपाल टेलिकमको फोरजी डाटा तथा मोबाइल नेटवर्कमा समस्या आएको छ । टेलिकमको फोरजी नेटवर्कमा समस्या आएको नेपाल टेलिकमले जनाएको छ ।
दिउँसो १ः४५ बजेदेखि समस्या आएकोमा अहिलेसम्म पनि समस्या समाधानको प्रयास भइरहेको प्राधिकरणका सह प्रवक्ता नवीन कुमार मिश्रले जानकारी दिएका छन । उनले भने, ‘एनटीसीको डाटा कोरमा समस्या देखिएको छ ।
कहाँनिर समस्या देखियो भर्खरै पत्ता लागेको जानकारी आएको छ, प्राविधिकहरू समस्या समाधानमा लागिरहनुभएको छ, केही समयमा समस्या समाधान होला ।’ त्यसो त, मोबाइल नेटवर्कमा पनि अहिले समस्या देखिएको गुनासो आइरहेको छ ।
तर, यसमा प्राविधिक रूपमा भने कुनै समस्या नरहेको उनको भनाइ छ । ‘फोरजीमा समस्या हुँदा मोबाइल नेटवर्कको बढी प्रयोग भएर केही समस्या आएको हुन सक्छ, प्राविधिक समस्या केही छैन, टूजी र थ्रीजीमा पनि समस्या छैन ।’
अहिलेको समस्या अचानक आएको र जटिल भएको भन्दै २२ वर्षको अनुभवमा अहिलेसम्म यस्तो समस्या नदेखिएको समेत उनको भनाइ थियो ।
