- शनिबार, १३ असार, २०८३
काठमाण्डु, २४ भदौ- प्रधानमन्त्री सुशील कोइरालाले नेकपा-माओवादीका अध्यक्ष मोहन वैद्य आफ्नो नजिकको मित्र भएको बताएका छन् ।
नेपाली काँग्रेसले सञ्चालन गरेको एक महिने बीपी विचार यात्राको मंगलबार काठमाण्डुको सुन्दरीजलमा समापन गर्दै कोइरालाले वैद्यसँग आफू निरन्तर सम्पर्क र सौहार्दपूर्ण वातावरणमा संवाद भइरहेको बताए ।
डडेल्धुरामा रहेका वैद्यसँग मंगलबार मात्र आफ्नो टेलिफोनमा कुराकानी भएको उल्लेख गरे । कोइरालाले सहमतिका लागि छिट्टै काठमाण्डु फर्कन आग्रह गरेको पनि जानकारी दिए ।
वैद्य समेतको सहभागितामा पूर्वनिर्धारित समय माघ ८ मै संविधान जारी हुने उनको भनाइ थियो । ‘मोहन वैद्यजी मेरो नजिकको मित्र हुनुहुहुन्छ’, कोइरालाले भने, ‘हामी निरन्तर संवादमा छौं, माघ ८ गते संविधान जारी गर्नेबारे कुरा भइरहेको छ ।’
उनले सबैको सहमतिमा संविधान जारी हुनेमा आशंका नगर्न आग्रह गरे । कसैलाई तल पारेर संविधान जारी गर्ने सोच आफ्नो नरहेको कोइरालाले प्रष्ट्याए ।
