- बुधबार, १० असार, २०८३
काठमाण्डु, २२ असार– एकीकृत माओवादीको असन्तुष्ट बाबुराम भट्टराई पक्ष पहिलोपटक पार्टी स्थायी कमिटी बैठकमा सहभागी भएको छ ।
लाजिम्पाटस्थित अध्यक्ष पुष्पकमल दाहाल ‘प्रचण्ड’ निवासमा आइतबार बसेको बैठकमा भट्टराई सहित उनी पक्षधर नेताहरु सहभागी भएका हुन् ।
स्थायी समितिमा सो पक्षका भट्टराईसहित टोपबहादुर रायमाझी र भट्टराई, देवेन्द्र पौडेल छन् । आफ्नो पक्षलाई सम्मानजनक स्थान नदिइएको भन्दै निर्वाचनबाट चुनिएको पोलिट्ब्युरो, स्थायी समिति र पदाधिकारीमा नबस्ने अडानमा भट्टराई पक्ष थियो ।
आजको छलफलले पार्टीमा सकारात्मक सन्देश गएको एक नेतालाई बताए ।
निर्वाचनलाई नौटंकीको संज्ञा दिएको सो पक्षले केन्द्रीय कमिटीभन्दा माथिल्लो निकायमा जिम्मेवारी नलिने बताएको थियो । स्थायी समिति सदस्यमा निर्वाचित भट्टराईलाई केन्द्रीय समितिले वरिष्ठ नेताको हैसियत दिएको छ । रायमाझी सचिव र पौडेल स्थायी समिति सदस्यमा निर्वाचित भएका थिए ।
स्थायी समिति सदस्य लोकेन्द्र विष्टमगरले भट्टराई पक्ष बैठकमा सहभागी हुनुलाई सकारात्मक रुपमा लिइएको बताए । बैठकमा विराटनगर राष्ट्िरय सम्मेलनपछि भएका देशव्यापी प्रशिक्षण, उपनिर्वाचनमा पार्टी पराजयको कारण र भट्टराई पक्षले केही जिल्लामा गठन गरेको समानान्तर कमिटीका सम्बन्धमा छलफल भइरहेको बताए ।
यसअघि शुक्रबार बसेको स्थायी समिति बैठकमा अधिकांश स्थायी समिति सदस्यले पार्टी हितविपरीत समानान्तर कमिटी गठन गर्नेमाथि अनुशासनको कारबाही गर्नुपर्ने आवाज उठाएका थिए ।
समानान्तर कमिटी गठनको विषयमा फेरी केहि दिनमै छलफल हुने पार्टी स्रोतले जानकारी दिएको छ ।
