अर्थ मन्त्रालयले भन्योः जेठ १४ गते रातिको सीसीटिभी फुटेज डिलिट भयो

काठमाण्डु, १९ असार– अर्थ मन्त्रालयले अर्थमन्त्री जनार्दन शर्माले संघीय संसद बैठकमा बजेट भाषण प्रस्तुत गर्नुभन्दा एक दिनअघि १४ जेठको सिसी टिभी फुटेज डिलिट भएको जनाएको छ ।
बजटे निर्माणका क्रममा अनाधिकृत व्यक्तिहरु अर्थ मन्त्रालयमा प्रवेश गरी अमुक स्वार्थ समूहलाई फाइदा हुने गरी करका दर परिवर्तन गरेको भन्ने समाचार सार्वजनिक भएको थियो । प्रमुख प्रतिपक्षी एमालेले सिसी टिभी फुटेज माग गर्दै प्रतिनिधिसभा बैठक नै अवरुद्ध गरेको थियो । तर, अर्थमन्त्री जनार्दन शर्माले एमालेले भन्दैमा सिसि टिभी फुटेज दिन जरुरी नभएको जवाफ दिए । उपभोक्ता अधिकारका क्षेत्रमा सक्रिय संस्था उपभोक्ता हित संरक्षाण् मञ्चले सूचनाको हकसम्बन्धी अधिकार प्रयोग गर्दै अर्थ मन्त्रालयसँग सो दिनको फुटेज मागेको थियो । तर, जवाफमा अर्थले १३ दिनभन्दा पछिको सिसिटिभी फुटेज स्वतः हट्ने भन्दै दिन असम्भव भएको जवाफ दिएको छ ।
मञ्चले २०७८ साल भदौ २४ गते राति ११ देखि २५ गते बिहान ६ बजेसम्मको र यो वर्षको जेठ १४ गते बेलुका ६ देखि १५ गते बिहान ६ बजेसम्मको सीसीटीभी फुटेजको माग गरेर असार १४ गते निवेदन दिएको थियो । यसैबीच
उपभोक्ता हित संरक्षण मञ्चका महासचिव विष्णु तिमिल्सिनाले मन्त्रालयले सूचना दिन इन्कार गरेकाले अब कानुनी बाटोबाट अघि बढ्ने बताए । ‘सीसीटिभी फुटेजको क्षमता र जडान भएको क्यामराका आधारमा बढीमा १३ दिनसम्मको मात्र अभिलेखमा रहने र त्यसअघिको अभिलेख क्रमशः मेटिंदै जाने छ’, अर्थले दिएको जवाफमा भनिएको छ । तर, गृह मन्त्रालयले जारी गरेको सीसीटीभी जडान तथा सञ्चालनसम्बन्धी कार्यविधिमा ३ महिनासम्म सीसीटीभी फुटेजको अभिलेख सुरक्षित राख्नुपर्ने व्यवस्था छ ।