- शनिबार, ८ वैशाख, २०८१
काठमाण्डु, १४ असार– तत्कालका लागि कार्यगत एकता र पछि पार्टी एकता गर्ने निष्कर्षमा पुगेका एकीकृत माओवादीसहित माओवादी धारका पाँच दलले औपचारिक रुपमा कार्यगत एकताको घोषणा गरेका छन् । 
काठमाण्डुको बिजुलीबजारस्थित एक पार्टी प्यालेसमा शनिबार पत्रकार सम्मेलन गरी एकीकृत माओवादी, नेकपा– माओवादी, मातृका यादव नेतृत्वको नेकपा (माओवादी) , परि थापा नेतृत्वको नेकपा एकीकृत र मणि थापा नेतृत्वको क्रान्तिकारी कम्युनिष्ट पार्टीले कार्यगत एकता घोषण गरेका हुन् ।
कार्यगत एकताको सात बुँदे उद्देश्य सार्वजनिक गरिएको छ । जसमा भावी संविधानका अन्तरवस्तुमा साझा धारणा बनाउने, शान्ति प्रक्रियाका बाँकी काम, राष्ट्रियता, जनतन्त्र, जनजिविका र भ्रष्टाचारलगायत मुद्धामा संयुक्त विज्ञप्ति जारी गर्ने, देशका मुख्य सहरहरुमा संयुक्त जभसा गर्ने र पार्टी एकताका लागि आवश्यक वैचारिक बहस गर्दै जाने उल्लेख छन् ।
पत्रकार दलमा पाँचवटै दलका शीर्ष नेताले राष्ट्रिय स्वाधिनता र भारतसँग गरिएका असमान सन्धि सम्झौता खारेजीको नारा अघि सारेर आन्दोलनमा जाने बताए ।
एकीकृत माओवादी अध्यक्ष पुष्पकमल दाहाल ‘प्रचण्ड’ ले सबैले ठूलो हण्डर र ठक्कर खाएपछि कार्यगत एकता सम्भव भएको बताए ।
ठूलो मिहेनत र लगातारको छलफलले आफूहरुलाई कार्यगत एकताको बिन्दुमा ल्याइपुर्याएको भन्दै उनले त्यसलाई चानचुने रुपमा नहेर्न भने ।
नेकपा–माओवादी अध्यक्ष मोहन वैद्यले कार्यगत एकताले पार्टी एकताको आधार तयार पारेको उल्लेख खरे । उनले शक्ति सञ्चयका लागि कार्यगत एकता गरिएको प्रष्ट्याए ।
मोर्चाको नेतृत्व एकीकृत माओवादी अध्यक्ष पुष्पकमल दाहाल ‘प्रचण्ड’, नेकपा–माओवादी अध्यक्ष मोहन वैद्य, नेकपा (माओवादी) का संयोजक मातृका यादव नेकपा एकीकृतका महासचिव परि थापा र क्रान्तिकारी कम्युनिष्ट पार्टीका महासचिव मणि थापाले चक्रीय प्रणालीका आधारमा गर्नेछन् । आवश्यकताअनुसार अन्य नेतासमेत बैठकमा उपस्थित हुन नसक्नेछन् । मोर्चाको बैठक महिनाको एक पटक बस्ने बताइएको छ ।
