गुल्मी , २२ वैशाख – गुल्मीका किसानहरुमा तरकारी उत्पादनको लहर चलेको छ ।
गाउँमा केही व्यक्तिले तरकारीखेतीबाट राम्रो आम्दानी गर्न थालेपछि गाविसमै मौसमी र बेमौसमी तरकारीखेती गर्नेको लहर चलेको हो ।
अहिले गाउँका धेरै किसानले पाखोबारीमा गोबी, बन्दा, साग मुला, खुर्सानी, आलु, गोलभेँडालगायतका तरकारी उत्पादन गरी मासिक रु १० हजारसम्म आम्दानी गर्न सफल भएको कृषक तुल्सीराम पाण्डेले बताए ।
आफ्नो गाउँघरको पाखोबारीलाई तरकारीखेती गर्ने उद्देश्यले आजभन्दा १० वर्ष अघिदेखि उत्पादन वृद्धिका लागि पटकपटक तालिममा समावेश भएको अगुवा कृषक पाण्डेको भनाइ छ ।
विदेश गएर फर्केका, अध्ययन सकेर बसेका युवा समेत तरकारीखेतीतर्फ आकर्षित भएका छन् । गुल्मीका समथर र उब्जाउ फाँट तथा सिँचाइको पनि राम्रो सुविधा भएका कारण कृषक निकै उत्साहित भएका छन् ।