- सोमबार, ४ साउन, २०८३
काठमाण्डू, ३ साउन– पूर्व प्रधानमन्त्री एवं एमाले अध्यक्ष केपी ओलीले सडक र सदनको दुवै मोर्चालाई अघि बढाउनुपर्ने बताएका छन ।
पार्टी कार्यालय च्यासलमा आयोजित सांसद प्रशिक्षण कार्यक्रममा बोल्दै दुई वटै मोर्चालाई प्रभावकारी बनाएर अघि बढ्नुपर्ने समेत बताएका छन ।
एमाले अध्यक्ष ओलीले भने, ‘सडक सङ्घर्षको मोर्चातिर पनि मनोबल अलि खस्किएको अवस्था छ । हामीले धक्का खाएका छौँ। धक्का खाएको अवस्थामा कसैको मनोबल एकदम बुलन्द भएर बढेको हुँदैन ।
धक्का परेपछि त अलिकति चोट त लाग्ने नै भयो। धक्काबाट उठेर अघि बढ्नुपर्छ ।’ उनले सडक सङ्घर्ष र संसदीय सङ्घर्ष एकअर्काका पूरक भएको बताएका छन ।
अहिलेको राजनीति परिभाषाविहीन, दिशाविहीन, नीतिविहीन र थितिविहीन बनेको बताएका छन । ओलीले भने, ‘लोकतन्त्रमा सरकार परिवर्तनका लागि संवैधानिक, कानुनी, संसदीय बाटाहरू हुन्छन् । हिंसा, आगजनी, तोडफोड, जबरजस्ती, कब्जा, असंवैधानिक यस्ता कुराहरू हुँदैनन् ।
राज्य पूर्ण अनुपस्थित छ र अराजकता देखापर्दैछ ।’ ओलीले सामाजिक सञ्जाल असामाजिक सञ्जालको रूपमा विकास भइरहेको समेत बताएका छन ।
उनले भने, ‘समाजमा एउटा भयानक विकृति पैदा गर्ने काम हुँदै छ ।, विकृति फैलाउने स्वस्थ बहस होइन, सामाजिक सञ्जालबाट बहस हुन सक्छ, स्वस्थ बहस हुन सक्छ ।
तर कोही उत्तरदायी नहुने, दर्ता गर्न नपर्ने, जवाफदेही लिनु नपर्ने, प्रतिनिधि तोक्नु नपर्ने र निराधार असत्य कुराहरू प्रचार गरिरहने काम हुँदै छ ।’
