दाजु पूर्व प्रधानमन्त्रीलाई स्वदेश फर्काउने बहिनी प्रधानमन्त्रीको कसरत

बैंकक,कात्तिक–थाईल्याण्डको संसदले पारित गरेको आममाफी सम्बन्धी कानुनको त्यहाँका प्रधानमन्त्री यिङ्लक सिनावात्राले बचाउ गरेकी छिन ।
सो कानुनको विरुद्धमा राजधानी बैंककमा मंगलवार विपक्षीहरुले विरोध प्रदर्शन गरेका छन् । विगत तीन दिनदेखि जारी रहेको सो प्रदर्शनकै क्रममा प्रधानमन्त्री यिङ्लकले सो कानुनको बचाउ गरेकी हुन । वर्तमान प्रधानमन्त्री यिङ्लक सिनावात्राले आफ्ना दाजु एवम् पूर्व प्रधानमन्त्री थाकसिनलाई स्वदेश फर्काउने लक्ष्यका साथ सो कानुन ल्याएको अरोप प्रतिपक्षको छ ।
यिङ्लकले विगतको पाँच वर्षको द्वन्द्वको स्मरण नगर्न र सबैलाई मिलेर जाने वातावरण देशमा बनोस भनेर सहयोग गर्न आग्रह गरेकी छिन ।
विपक्षी दलका हजारौँ कार्यकर्ता सडकमा ओर्लिएर सो कानुनको विरोध गरिरहेका छन । उनीहरुले सो कानुनको खारेजीको माग गरिरहेको छन् ।
देशमा रहेका केही राजनीतिक दलका कार्यकर्ता एवम् नेतालाई लक्ष्य गरेर सो कानुन ल्याइएको भन्दै उनीहरुले सो कानुन नमान्ने बताएका छन् । उक्त कानुन वर्तमान सरकारले बाहुल्यता रहेको थाई संसदले हालै पारित गरेको थियो ।
थाईल्याण्डका पूर्व प्रधानमन्त्री थाकसिन सिनावात्रा पनि स्वदेश फर्किन पाउनेगरी सो कानुन ल्याइएको भन्दै उक्त विरोध प्रदर्शन गरिएको बिपक्षीले जनाएका छन । तर यिङ्लक भने देशमा एकताको भावना जागृत गर्न र राष्ट्रियता र विकासका लागि एकताबद्ध भएर अघि बढ्न सबै राजनीतिक दल तथा विचारहरु अटाउन सक्नेगरी सो आममाफी सम्बन्धी कानुन ल्याइएको मङ्गलबार बताएकी छिन ।
पूर्व प्रधानमन्त्री थाकसिन भ्रष्टाचारसम्बन्धी मुद्दा लागेका कारण विदेशमा रहेका छन् । यो कानुन पारित भएपछि उनी पनि स्वदेश फर्किन पाउने छन् ।
वर्तमान प्रधानमन्त्रीले आफ्ना दाजुलाई स्वदेश फर्काइ राजनीतिमा स्थापित गर्नका लागि उक्त कानुनको सहारा लिएको दाबी गरेका छन् । रासस/एएफपी