- मंगलबार, ११ वैशाख, २०८१
काठमाण्डु– एकताका एकीकृत नेकपा माओवादीमा प्रवेश गरेका भनिएको नेपाली फिल्म क्षेत्रका वरिष्ठ निर्देशक तथा कलाकार नीर शाह नेपाली काँग्रेसको चुनावी प्रचारमा देखिन थालेका छन् ।
मंगलबार काठमाण्डु निर्वाचन क्षेत्र नं १ मा काँग्रेसको चुनावी घरदैलो कार्यक्रमपछि अनामनगरमा काँग्रेसको प्रचारमा चुनावी भाषणसमेत गरेका निर्देशक शाहले आफू पहिले पनि माओवादी नभएको अहिले पनि माओवादी नभएको प्रष्ट्याएका हुन् । राजेन्द्र खड्गी, युवराज लामा लगायतका कलाकारहरु एमाओवादीमा प्रवेश गरेका बेला शाह पनि एमाओवादी प्रवेश गरेको समाचार आएको थियो ।
शुभकामना दिन मात्र माओवादी कार्यक्रममा
निर्देशक शाहले काठमाण्डु टुडेसँग कुरा गर्दै भने, ‘युवराजजीहरु माओवादी जानुहुँदा, म उहाँहरुलाई शुभकामना दिन मात्र माओवादीको कार्यक्रममा गएको हुँ । यसैलाई नीर शाह पनि माओवादी प्रवेश गरे भन्ने हल्ला गरियो । म माओवादी प्रवेश गरेकै छैन ।’ साथीहरुलाई एक कलाकारको रुपमा मात्र शुभकामना दिन गएको दावी गर्दै उनले भने, ‘म पहिला पनि माओवादी थिइन, अहिले पनि माओवादी होइन ।’
काँग्रेस राजतन्त्र मान्ने पार्टी
खुलेर काँग्रेसको प्रचारमा लागिरहेका निर्देशक शाहले हालसालै मात्र आफू नेपाली काँग्रेसमा प्रवेश गरेको बताए । ‘यति नै दिन भयो काँग्रेस प्रवेश गरेको भन्ने त छैन, केही समय भयो’, उनले भने, ‘काँग्रेसले संवैधानिक राजतन्त्रलाई मान्ने हुँदा म काँग्रेस गएको हुँ ।’
आफ्नो विधानबाट राजतन्त्र हटाइसकेपनि काँग्रेस वास्तवमा संवैधानिक राजतन्त्र मान्ने पार्टी भएकाले आफू काँग्रेसमा प्रवेश गरेको उनको तर्क छ । केही दिनमा गहनापोखरीमा हुने काँग्रेसको कार्यक्रममा सहभागी हुने तयारी भइरहेको उनले जनाए ।
राजनीति र कलाकारिता अलग–अलग
हिजोआज कलाकारहरुमा खुब राजनीति लागेको छ नि, कलाकारले राजनीति गर्नुलाई कसरी हेर्नुहुन्छ भनेर सोध्दा निर्देशक शाहले कलाकारले राजनीति गर्न हुने बताए ।
‘कलाकारले राजनीति नै गर्छु वा राजनीति पनि गर्छु भनेर लाग्छ भने कि नहुनु ? तर, कलाकारितामा भने राजनीति आउनु भएन’, निर्देशक शाहले भने, ‘यी दुई फरक भूमिका हुन्, दुबैलाई छुट्टाछुट्टै अभ्यास गरेर गर्ने हो भने हुन्छ, दुबैलाई एकै अभ्यास गरेर चाहिँ हुँदैन ।’
