- शुक्रबार, १४ वैशाख, २०८१
काठमाण्डु, १७ फागुन– नेकपाको प्रचण्ड–नेपाल समूह, नेपाली काँग्रेस र जनता समाजवादी पार्टीबीच नयाँ सत्तासमीकरण बन्ने भएको छ ।
उच्च श्रोतका अनुसार सम्भवतः बिहीबार वा शुक्रबारसम्ममा त्रिपक्षीय सत्ता साझेदारीसम्बन्धी लिखित सम्झौतामा हस्ताक्षर हुनेछ । तीन दलबीच प्रधानमन्त्री केपी ओलीलाई अविश्वास प्रस्तावमार्फत पदमुक्त गर्ने समझदारी भएको छ ।
२३ फागुनमा संसद बैठक सुरु हुनु अगावै नेपाली काँग्रेसका तर्फबाट प्रधानमन्त्रीको उम्मेदवारसहित अविश्वास प्रस्ताव दर्ता हुनेछ । तीन दलले प्रधानमन्त्रीमा काँग्रेस सभापति शेरबहादुर देउवालाई अगाडि सारेका छन् ।
सर्वोच्च अदालतले ११ फागुनमा प्रतिनिधिसभा पुर्नस्थापना गरेपछि प्रधानमन्त्री ओलीमाथि नैतिकताका आधारमा राजीनामा दिन दबाब थियो । तर, ओलीले राजीनमा नदिने, बरु संसद फेस गर्ने अडान लिएका छन् । संसदको सामना गर्ने तयारी स्वरुप यसबीचमा ओलीले देव गुरुङलाई हटाएर आफू पक्षधर खोटाङका सांसद विशाल भट्टराईलाई नेकपा संसदीय दलको प्रमुख सचेतक नियुक्त गरेका छन् ।
प्रतिनिधिसभा पुर्नस्थापना भएलगत्तै नेकपाको दुवै समूहले देउवालाई प्रधानमन्त्री अफर गरेको थियो ।
तर, पार्टीमा निर्णय गरेर जवाफ दिने भन्दै देउवाले कुनै पनि पक्षलाई बचन दिएका थिएनन् । ओलीले असंवैधानिक रुपमा जनप्रतिनिधिमुलक संस्था विघटन गरेकाले उनीसँग सहकार्य गर्न नहुनेमा पार्टीभित्र दबाब परेपछि देउवा प्रचण्ड–नेपालको समर्थनमा प्रधानमन्त्री बन्न लागेका हुन् ।
