- शुक्रबार, २६ वैशाख, २०८२
काठमाण्डु, १४ मंसिर– उपप्रधान तथा गृहमन्त्री नारायणकाजी श्रेष्ठले त्रिपालमुनि रहेका जाजरकोटका भूकम्पपीडितलाई छानामुनि ल्याउन सरकारले काम गरिरहेको बताएका छन् ।
राष्ट्रियसभाअन्तर्गतको राष्ट्रिय सरोकार तथा समन्वय समिति बैठकमा बिहीबर श्रेष्ठले अस्थायी आवास निर्माणका लागि मन्त्रिपरिषदले सबै सुरक्षा निकाय परिचालन गर्ने निर्णय गरेको जानकारी दिए ।
चिसो याममा त्रिपालमुनि बसेका भूकम्पपीडित थप समस्यामा नपरुन् भनेर सरकारले न सेना, सशस्त्र प्रहरी र नेपाल प्रहरीलाई अस्थायी आवास निर्माणमा खटाउने निर्णय गरेको बताए ।
सम्बन्धित जिल्लास्थित जिल्ला विपद् व्यवस्थापन समितिले सुरक्षा अङ्गलाई आवश्यकतानुसार परिचालित गर्न सक्ने व्यवस्था मिलाइएको जानकारी दिँदै उपप्रधानमन्त्री श्रेष्ठले थप जनशक्ति आवश्यक परे उपलब्ध गराउन सरकार तयार रहेको प्रतिबद्धता जनाए ।
सरकारले तत्कालै तीन चरणको काम अघि बढाएको उल्लेख गर्दै उद्धार, राहत र आवास पुनः निर्माणलाई प्राथमिकतामा राखिएको श्रेष्ठले बताए ।
गत कात्तिक १७ गते जाजरकोट केन्द्रबिन्दु भई गएको भूकम्पमा जाजरकोटमा एक सय एक र रुकुम पश्चिममा ५३ गरी कुल एक सय ५४ जनाको मृत्यु भएको थियो ।
समितिले त्रिपालमुनि बसेका केही भूकम्प पीडितको चिसोका कारण मृत्यु भएको विषयमा सरकारको ध्यानाकर्षण गराएको थियो ।
