सरकार जसले पनि बनाउँछ, अहिलेको प्रश्न देश कसले बचाउँछ भन्ने होः विश्वप्रकाश शर्मा

आज (बुधबार) कांग्रेसले जनकपुरको तिरहुँतियामा गरेको प्रतिज्ञासभामा पार्टीको निर्वाचन परिचालन समितिका संयोजकसमेत रहेका उपसभापति शर्माले यस्तो बताएका हुन ।

उनले अहिलेको मूल प्रश्न देश र व्यवस्था कसले बचाउँछ भन्ने रहेको पनि बताएका छन । उपसभापति शर्माले भने, ‘मूल प्रश्न देश कसले बचाउन सक्छ भन्ने हो । सरकार त जसले पनि बनाउँछ । जसले पनि चलाउँछ ।’ उनले कांग्रेस सुशासन स्थापित गर्नका लागि साझा सङ्कल्प तय गर्न गोलमेच सम्मेलन गर्न पनि तयार रहेको बताए ।

‘सुशासन स्थापित गर्ने साझा सङ्कल्प गरेर जाऊँ त्यसका लागि हामी गोलमेच गर्न तयार छौँ,’ शर्माले भने, ‘सोच र दृष्टिकोण साझा बनाउन छलफलका लागि हामी तयार छौँ ।’ उनले अहिले मुलुकमा दुई किसिमका विचारहरू रहेको भन्दै दुवै विचारको उपयुक्त नभएका बताए । ‘मुलुकमा दुई किसिमका कुरा आएका छन् ।

एउटा भदौ २३ अगाडि देशमा ठिकठाक थियो । अर्को भन्छ भ्रष्टाचार थिए, सबै बिग्रिएको थियो,’ शर्माले भने, ‘तर, हामी मध्यमार्गी सोच राख्छौँ ।’

जेनजीले उठाएका मुद्दाहरूलाई सम्बोधन गर्न नसके, अहिले जेनजीको नेतृत्वमा विद्रोह भएको र १० वर्षपछि अल्फाको नेतृत्वको विद्रोह हुने शर्माले बताए । आफू नबदलिए देश बदल्न नसकिने भन्दै कांग्रेसले विशेष महाधिवेशनबाट नेतृत्व बदलेको शर्माले बताए ।