- मंगलबार, १२ साउन, २०८३
काठमाण्डू, ५ फागुन– कांग्रेसका नेता डा. शेखर कोइरालाले संविधान संरक्षणका लागि प्रतिनिधिसभा सदस्य निर्वाचनमा होमिएको बताएका छन । मोरङ– ६ अन्तर्गत विराटनगर ५ जामुनगाछीमा मंगलबार चुनाव प्रचार प्रसारका क्रममा नेता कोइरालाले यस्तो बताएका हुन ।
संसदीय सर्वोच्चताका लागि र स्वतन्त्रताका लागि आफू निर्वाचनमा होमिएको पनि उनले बताए । आम सर्वसाधारणसँगको भेटघाटका क्रममा नेता कोइरालाले संसदमा सर्वोच्चता नहुँदा भोलि कांग्रेस पनि कम्युनिस्ट हुने पनि बताएका छन ।
नेता कोइरालाले भने, ‘संसद्को सर्वोच्चताका लागि मलाई तपाईंहरुले संसदमा पठाउनुहुनेछ । संसदमा कांग्रेसको सर्वोच्चता नहुँदा कांग्रेस पनि कम्युनिस्ट हुनेछ । जुन आम विराटनगरवासीले चाहेका छैनन् । मुलुकको राजनीतिक अवस्था गम्भीर छ । त्यसैले पनि सबैले निर्वाचनलाई गम्भीरतापूर्वक लिएर मतदान गर्नुहुने अपेक्षा छ ।’ नेता कोइरालाले नयाँ पार्टीबारे आवश्यक कुरा बुझ्न जरुरी रहेको उल्लेख गरे ।
पुराना दलहरूप्रति नकारात्मक भाष्य, अफवाह फैलाइएको बताउँदै नेता कोइरालाले भने, ‘नयाँ पार्टीले पुराना दलका विषयमा फैलाएको अफवाह चिर्न आवश्यक छ । यसप्रति सबै सजग हुनुपर्छ । जेनजी विद्रोहपछि मुलुक थप पछाडि धकेलिएको महसुस भएको छ । सोही आन्दोलनले ०८४ मा हुने निर्वाचनलाई २ वर्षअघि निम्ताएको छ । त्यसैले यो चुनाव मात्र नभएर जनमत सङ्ग्रह भएर गएको छ ।’
निर्वाचन र मतका विषयमा विदेशमा रहेका परिवारका सदस्यले यहाँ घरमा रहेका आमाबुवाको अवस्था नबुझी अमुक पार्टीलाई सहयोग गर्न उक्साइरहेको उनको भनाइ छ । उनले भने, ‘विदेशमा रहनु भएकाहरूलाई यहाँको अवस्था बुझ्न आग्रह गर्छु । घरमा समस्या पर्दा आमाबुवालाई यहाँ हामीले नै सहयोग गर्ने हो ।
हाम्रै दलका साथीहरू दिनरात खटिनुभएको छ।’ विराटनगरका वडाहरूमा विकास क्रमले गति लिएको उनले बताए । वित्तीय आयोगले विराटनगर महानगरलाई पहिलो स्थानमा पुराएको कुरालाई गर्व गर्नुपर्ने बताउँदै उनले महानगरको विकासको नेतृत्व कांग्रेसले गरे पनि आम नागरिकको सहयोगले पहिलो भएको पनि बताएका छन ।
उनले भने, ‘विराटनगरले वित्तीय सुशासन कायम राखेको छ । यसलाई हामी सबै महानगरवासीले गर्व गर्नुपर्छ । काठमाडौँको हकमा हेरौँ अन्तिम स्थानमा पुगेको छ । काठमाडौँले न सुशासन कायम राख्न सक्यो, न वित्तीय पारदर्शिता, न जनताप्रति जबाफदेहिता ।’
