- सोमबार, २१ असोज, २०८१
एजेन्सी– पूर्वअमेरिकी राष्ट्रपति तथा राष्ट्रपतीय निर्वाचनका रिपब्लिकन उम्मेदवार डोनाल्ड ट्रम्पको फेरि हत्या प्रयास भएको छ ।
फ्लोरिडा राज्यस्थित निजी गल्फ कोर्टमा गल्फ खेलिरहेको समयमा उनीमाथि हत्या प्रयास भएको अन्तर्राष्ट्रिय सञ्चारमाध्यमले जनाएका छन् । तर, आक्रमण हुनै लाग्दा सुरक्षाकर्मीले आक्रमणकारीलाई नियन्त्रणमा लिएका कारण अप्रिय घटना हुन नपाएको न्यूयार्क टाइम्सले जनाएको छ ।
गल्फ कोर्टको केही सय मिटर अगाडि आक्रमणका लागि ती व्यक्ति लुकेर बसेका बेला सुरक्षाकर्मीले नियन्त्रणमा लिएका थिए । सुरक्षाकर्मीले नियन्त्रणमा निले प्रयास गर्दा ती व्यक्तिले गोली चलाए । गोली चलाएर भागेका उनलाई केही समयमै प्रहरीले नियन्त्रणमा लिएको छ ।
उनको साथबाट अत्याधुनिक एके–४७ राइफल बरामद भएको छ । ती संदिग्ध आक्रमणकारी ५८ वर्षीय र्यान वेस्ली रथ रहेको अमेरिकी सञ्चारमाध्यमले जनाएको छ । घटनापछि ट्रम्पले सामाजिक सञ्जालमार्फत आफू ठीक रहेको जानकारी दिएका छन् । ह्वाइट हाउसले उक्त घटनाबारे राष्ट्रपति जो बाइडेन र उपराष्ट्रपति कमला ह्यारिसलाई जानकारी गराएको छ ।
ट्रम्पमाथि आक्रमणको प्रयास भएको यो दोस्रो पटक हो । यसअघि जुलाई १३ मा पेन्सिलभेनियाको र्यालीमा सम्बोधन गर्दै गरेका ट्रम्पमाथि गोली प्रहार भएको थियो ।
कानमा गोली लागे पनि उनी बाँच्न सफल भए । तर, उनका एक समर्थकको ज्यान गयो । ट्रम्पमाथि गोली चलाउने २० वर्षीय थोमस क्रुक्स सुरक्षाकर्मीको गोली लागी मारिए ।
