- बुधबार, १७ असोज, २०८०
काठमाण्डु, ७ भदौ– गृह मन्त्रालयले त्रिभुवन अन्तर्राष्ट्रिय विमानस्थल अध्यागमन विभाग प्रमुख सह–सचिव झलकराम अधिकारीलाई फिर्ता बोलाउने तयारी गरेको छ ।
अधिकारीको ६० केजी सुन तस्करी प्रकरणमा पक्राउ परेका चिनियाँ मुलका बेल्जियन नागरिक दावा छिरिङसँग ‘कनेक्सन’ देखिएको भन्दै गृहले हटाउने तयारी गरेको हो ।
यद्यपि श्रोतले अधिकारीलाई प्रहरीमार्फत पक्राउ गर्ने कि मन्त्रालयमा फिर्ता बोलाएर बयान लिने भन्नेबारे निर्णय हुन बाँकी रहेको जनाएको छ । गत २ साउनमा हङकङ हुँदै मोटरसाइकलको ब्रेकसुमा लुकाएर राखिएको सुन भन्सार पास भएर बाहिरिएपछि राजश्व अनुसन्धान विभागले सिनामंगलबाट नियन्त्रणमा लिएको थियो ।
बुधबार मात्र प्रतिनिधिसभा बैठकमा बोल्दै राष्ट्रिय स्वतन्त्र पार्टी (रास्वपा) सभापति रवि लामिछानेले सरकारका एक बहालवाला महानिर्देशक सुन तस्करीमा संलग्न रहेको प्रमाण आफूसँग रहेको र आवश्यक परे सरकारलाई उपलब्ध गराउने बताएका थिए ।
‘सरकारका बहालवाला एक निर्देशकले सुन आएको कुराको जानकारी पक्राउ परेका दावा नामका व्यक्तिलाई फोटोसहित पठाएको जानकारी मसँग छ’, उनले भनेका थिए । लामिछानेले संकेत गरेका व्यक्ति महानिर्देशक अधिकारी भएको खुलेको छ ।
