- आइतबार, २२ असार, २०८२
काठमाण्डू, २१ असार– नागरिक उन्मुक्ति पार्टी (नाउपा) ले केपी ओली नेतृत्वको सरकारलाई दिएको समर्थन फिर्ता लिने निर्णय गरेको छ ।
शनिबार बसेको सो पार्टी संसदीय दल बैठकले सरकारलाई दिएको समर्थन फिर्ता लिने निर्णय गरेको हो । नागिरक उन्मुक्ति पार्टीकी अध्यक्ष एवं संसदीय दलको नेता रञ्जिता श्रेष्ठले आइतबारदेखि नै आफूहरु प्रतिपक्षमा बस्ने बताइन् ।
उनका अनुसार पार्टीले आइतबार नै सरकार छाड्नेछ । नागरिक उन्मुक्तिबाट अरूणकुमार चौधरी संस्कृति, पर्यटन तथा नागरिक उड्डयन राज्यमन्त्री छन् ।
चौधरीले आइतबार प्रधानमन्त्री ओली समक्षा राजीनामा बुझाउने श्रेष्ठले जानकारी दिइन् । नाउपाले यसअघि शुक्रबार सुदूरपश्चिम प्रदेश सरकारलाई दिएको समर्थन पनि फिर्ता लिने निर्णय गरेको थियो ।
सुदूरपश्चिम प्रदेशका मुख्यमन्त्री कमलबहादुर शाहले नाउपाबाट सरकारमा सहभागी उद्योग, पर्यटन, वन तथा वातावरणमन्त्री रामेश्वर चौधरीलाई बर्खास्त गरेको प्रतिक्रिया स्वरुप नाउपाले संघ र प्रदेश सरकारलाई दिएको समर्थन फिर्ता लिएको हो ।
शाहले बजेट निर्माण र राजनीतिक नियुक्तिमा चलखेल गरेको भन्दै चौधरीलाई हटाएका हुन् । सत्ता साझेदार दलको सहमतिबिनै मन्त्री हटाएको भन्दै नाउपाका नेताहरु आक्रोशित छन् ।
