- मंगलबार, ६ जेठ, २०८२
काठमाण्डु, ९ वैशाख– काठमाण्डुको टोखा नगरपालिका– ८ मिलनटोलमा आगलागी हुँदा एक करोड रुपैयाँ बराबरको क्षति भएको छ ।
श्याम श्रेष्ठले निर्माण गरेको मिलन बजारमा धर्मराज डंगोलले सञ्चालन गरेको मासु पसलबाट ग्यास लिक भई शुक्रबार बेलुका आगलागी भएको बताइएको छ ।
आगोले पाँच वटा पसलमा क्षति भएको प्रहरीले बताएको छ। आगलागीबाट पाँच वटा पसलमा रहेका सामान जलेको र एक करोड बराबरको क्षति भएको अनुमान गरिएको जिल्ला प्रहरी परिसर काठमाण्डुका प्रवक्ता, प्रहरी उपरीक्षक सीताराम रिजालले जानकारी दिएका छन ।
आगलागीमा परेर कमला तामाङले सञ्चालन गरेको जुत्ता पसल जल्दा रु १६ लाख, मुना थापाले सञ्चालन गरेको फेन्सी पसल जल्दा रु ३५ लाख, प्रदीप लम्सालले सञ्चालन गरेको दूध डेरी जल्दा रु दुई लाख, विकास श्रेष्ठले सञ्चालन गरेको सिलाइ कपडा पसल जल्दा रु दुई लाख, मधु न्यौपानेले सञ्चालन गरेको मोबाइल पसल जल्दा रु २० लाख र धर्मराज डङ्गोलले सञ्चालन गरेको मासु पसल जल्दा रु २५ लाख रुपैयाँ बराबरको क्षति भएको प्रहरीले जानकारी दिएको छ ।
यस्तै श्याम श्रेष्ठ, टेकराज पोखरेल र धनबहादुर बस्नेतका तीन वटा खाली सटरसमेत जलेर नष्ट भएको प्रवक्ता रिजालले जानकारी दिएका छन ।
नेपाल प्रहरी, स्थानीय बासिन्दा, पानीको दुई वटा दमकल, तीन वटा पानीको ट्यांकरको सहायतामा आगलागी नियन्त्रणमा उनले बताएका छन ।
