गगन थापाको खतरनाक भविष्यबाणी, कसले दियो यस्तो सूचना ?

काठमाण्डु, १४ जेठ– कांग्रेस नेता एवं सांसद गगनकुमार थापाले आगामी चार वर्षमा नेपाल बर्बाद भइसक्ने दाबी गरेका छन् ।
थापाले चार वर्षमा कम्युनिष्ट सरकारका कारण देश बर्बाद हुने दाबी गरेका हुन् । काँग्रेस निकट विद्यार्थी संगठन नेपाल विद्यार्थी संघले तनहुँको दमौलीमा मंगलबार गरेको कार्यक्रममा थापाले केपी ओली नेतृत्वको सरकार मुलुकलाई बर्बादीतिर धकेल्न उद्दत रहेको आरोप लगाए । प्रधानमन्त्री केपी ओली मुलुकलाई कम्बोडिया बनाउन अग्रसर बनेको आरोप उनले लगाए । ‘हुन सेन हाम्रा प्रधानमन्त्रीका आदर्श हुन्’, थापाले भने, ‘उहाँ नेपाललाई कम्बोडिया बनाउन उद्दत हुनुहुन्छ ।’
सरकार जनताका लोकतान्त्रिक अधिकारप्रति अनुदार बन्दै गएको र आगामी निर्वाचनमा थप अनुदार बन्ने आरोप उनको थियो । वर्तमान सरकारले नै निर्वाचन गराउने हो भने उक्त निर्वाचन निस्पक्ष हुन नसक्ने थापाले दाबी गरे । सरकारका कारण मुलुकमा उद्योगधन्दा बन्द हुने क्रम तीव्र भएको र यो चार वर्षमा त्यो धेरै बढ्ने बताए । ‘कम्युनिष्ट सरकारका कारण मुलुक बर्बाद हुन्छ’, थापाले भने, ‘लेखेर राख्नुस् चार वर्षमा अझै धेर उद्योगधन्दा बन्द गरिन्छन् र रोजगारी खोसिन्छ ।’ थापाले कम्युनिष्ट नेतृत्वको सरकार भएका मुलुकले विकास र समृद्धि हासिल गरेको उदाहरण कतै नभएको तर्क गर्दै उनले नेपालमा पनि त्यो सम्भव नरहेको जिकिर गरे ।