- सोमबार, १६ असार, २०८२
काठमाण्डू, १५ असार– प्रमुख प्रतिपक्षी दल नेकपा माओवादी केन्द्रका प्रमुख सचेतक हितराज पाण्डेले देशको सबैभन्दा माथिको पदमा रही सकेको व्यक्तिलाई राजनीतिमा आउन संविधानले नरोकेको बताएका छन् ।
संसद भवन परिसरमा सञ्चारकर्मीहरूसँगको कुराकानीमा उनले व्यक्तिको चाहनालाई नकार्न नसकिने बताएका हुन । उनलाई पूर्वराष्ट्रपति विद्यादेवी भण्डारीले राजनीतिमा फर्कने घोषणा गरेको बारे प्रश्न सोधिएको थियो ।
प्रमुख सचेतक पाण्डेले सम्माननीय पदमा पुगिसकेको देशको सबैभन्दा माथि रही सकेको व्यक्ति भएपनि आफ्नो चाहनालाई नकार्न नसकिने बताएका हुन । संविधानले राजनीति गर्न हुँदैन भनेर नरोकेको उनको तर्क थियो ।
उनले भने, ‘सम्माननीय पदमा पुगिसकेको देशको सबैभन्दा माथि रही सक्नुभएको व्यक्तिको आफ्नो चाहना हो, संविधानले कतै रोकेको जस्तो लाग्दैन ।
उहाँको आफ्नै निर्णय हो ।’ भण्डारी एमालेको राजनीतिमा सक्रिय भइहाल्दैमा वाम एकता भइहाल्छ भन्ने आफूलाई नलागेको उनले बताएका छन । उनले भने, ‘कम्युनिष्टहरुका बीचमा एकता हुनुपर्छ । सबै बलियो हुनुपर्छ ।
एकताबद्ध हुनुपर्छ भन्ने सैद्धान्तिक कुरा त छँदैछ, ‘हिजो एउटा कार्यक्रममा पूर्वराष्ट्रपतिले जसरी विषयवस्त राख्नुभएको छ त्यसले वाम एकता भइहाल्छ भन्नेकुरा मलाई लागिरहेको छैन ।’
