- बिहीबार, ११ असोज, २०८०
संखुवासभा, ६ जेठ – संखुवासभाको सदरमुकाम खाँदबारीको एक होटलबाट प्रहरीले पाँचजनालाई पक्राउ गरेको छ ।
विशेष सुराकीका आधारमा प्रहरीले होटल सञ्चालकसहित पाँचजनालाई पक्राउ गरेको जिल्ला प्रहरी कार्यालय संखुवासभाका प्रहरी निरीक्षक सन्तोष राईले जानकारी दिए । पक्राउ पर्नेहरूमा दुईजना पुरुष र तीनजना महिलालाई पक्राउ गरेको जनाएको छ ।
उनीहरूलाई सदरमुकाम खाँदबारीको जस्मिन होटलबाट अनैतिक क्रियाकलाप गरेको आरोपमा पक्राउ गरेको प्रहरीको भनाइ छ । रातको समयमा होटलभित्र अनैतिक क्रियाकलाप गरेको आरोपमा होटल सञ्चालकलाई समेत पक्राउ गरिएको प्रहरीले बताएको छ ।
पक्राउ परेका पाँचैजनालाई हिरासतमा राखी थप अनुसन्धान भइरहेको जिल्ला प्रहरी कार्यालय संखुवासभाले जनाएको छ।
