देव गुरुङले विप्लवलाई भने, ‘पदप्रतिष्ठा खोज्ने कम्युनिस्ट हुन सक्दैन’

बुटवल, १७ मंसिर– नेकपा–माओवादीका सचिव देव गुरुङले नेत्रविक्रम चन्द ‘विप्लव’लाई पदप्रतिष्ठा मात्रै खोजेर कम्युनिस्ट हुन नसकिने भन्दै पार्टी फुटको औचित्य पुष्टि गर्न चुनौती दिएका छन् ।

नेकपा–माओवादी रुपन्देहीले आज बिहान बुटवलमा आयोजना गरेको पत्रकार सम्मेलनमा बोल्दै सचिव गुरुङले सैद्धान्तिक, राजनीतिक वैचारिक रुपले पार्टी फुटको औचित्य पुष्टि गर्न नसक्ने दाबी समेत गरे ।
उनले आवेश र उत्तेजनामा आएर पार्टीसँग सम्बन्धबिच्छेद गरेको आरोप लगाउँदै व्यक्तिगत पद प्रतिष्ठाको राजनीतिले कम्युनिस्ट बन्न नसकिने बताए । उनले एमाओवादी अध्यक्ष र बाबुराम भट्टराईले पार्टीभित्र गरेका गम्भीर प्रकारका गल्तीलाई सच्चाएर माओवादीले अघि सारेका छबुँदे एजेन्डालाई स्वीकार गरेमा पार्टी एकता हुन सक्ने बताउनुभयो ।
गुरुङले यो संविधान सभाबाट जनताले चाहेजस्तो संविधान बन्न नसक्ने भन्दै तत्काल संविधानसभा विघटनको माग गरे ।
सरकारमा रहेका नेपाली काँगे्रस, नेकपा एमालेलगायतका दलले नाम मात्रको संविधान ल्याउन खोजिरहेका भन्दै नेता गुरुङले नाम मात्रको संविधानले देशलाई समाधान दिन नसक्ने दाबी गरे ।