दुर्घटनामा बितेका बाबुआमासँग गफ गर्न तीन दिनदेखि बालक भोकै

कैलाली, १६ मंसिर– १२ वर्षका सागर ढोली आफ्ना आमाबुबा निको भएर आउने आसामा धनगढीस्थित सेती अञ्चल अस्पताल परिसरमा तीन दिनदेखि कुरेर बसेका छन् ।
आफन्तसँगै रहेका बालक सागरलाई उनका आमाबुबा घाइते अवस्थामा रहेको र भित्र उपचार भएर चाँडै निको भएर आउँछन् भनेर आफन्तले आश्वासन दिएका छन् ।
तीन दिनदेखि राम्रोसँग खान, बस्न नपाएर थकित अवस्थामा रहेका सागर आमाबुबालाई निको भएपछि सँगै बम्बई जाने प्रतिक्षामा समेत रहेका छन् । अबोध बालक सागरलाई के थाहा सँगैको सीटमा रहेका आमाबुबा कहिल्यै नर्फकने गरी गइसकेका छन् भन्ने ।

सागरलाई सँगै रहेका आफन्तजनले उनका आमाबुबा सामान्य घाइते अवस्थामा रहेको चाँडै निको हुने भनेर आलटाल गरी मृत्यु भइसकेको भनेर अझै भनेका छैनन् ।
सेती अञ्चल अस्पताल परिसरमा भेटिएका सागरले आमाबुबा सँगै बम्बई जान भनेर आएको बताए । पहिलोपटक बम्बई जान लागेका सागरले बसमा आउँदा आमा र बुबाको गोडा (खुट्टा) मा सुतेर आएको बताउदै बस खस्दा करालो (ओरालो) ठाउँ आयो होला भन्ने सोचेको तर बस एकैपटक ठूलो आवाजसहित पल्टेको बताए ।
सो बस दुर्घटनामा परी सागर पनि घाइते भएका छन् । उनी अत्तरियास्थित पद्मा अस्पतालमा उपचारपश्चात् आमाबुबालाई भेट्ने भनेर धनगढीस्थित सेती अञ्चल अस्पताल परिसरमा शनिबार साझदेखि पर्खेर बसेका छन् । तर, उनका आमाबुबालाई अञ्चल अस्पतालको उपचार गर्ने कोठामा नभएर शव गृहको कोठामा पोष्टमार्टमका लागि राखिएको छ ।
राधानी दैनिकबाट