सुनकोसी पहिरोमा हुँदै नभएका ११ जना मृत घोषित

सिन्धुपाल्चोक, ६ असोज– सरकारले एक सय ५६ जनालाई मृत घोषित गरेर सामूहिक अन्त्येष्टि गराए पनि सुनकोसीको पहिरोमा एक सय ४५ जनाको मृत्यु भएको पुष्टि भएको छ ।
मृतकको संख्यासमेत यकिन गर्न नसक्ने जिल्ला प्रशासनले राहत वितरण पनि त्यस्तै हचुवाको भरमा गरेको छ । मृत्यु भएका भनिएका ११ जनाको नाम, थर, ठेगाना, गाँउ केही पनि पत्ता लागेको छैन ।

सिन्धुपाल्चोक प्रशासन कार्यालयले शव भेटिएका र हराएका सबै गरी १ सय ५६ जनालाई एकमुष्ट मृतक घोषणा गरेको छ । तर, प्रशासनसँग एक सय ४५ जनाको मात्रै नाम छ ।
‘प्रशासनले सोधखोजका आधारमा एक सय ५६ जनालाई मृत घोषणा गर्‍यो । तर ११ जनाको नाम थाहा छैन । पुरिएका आठ घरका परिवारका बाँकी सदस्य कोही पनि छैनन्,’राहत बाँड्न खटिएका सशस्त्रका प्रहरी निरीक्षक मदनकुमार तामाङले भने, ११ जनाको दावी विरोध आएन, उनीहरुको नाम पनि थाहा भएन ।’
नयाँ पत्रिकाबाट