- बुधबार, १२ वैशाख, २०८१
सिरहा, १२ असार – सिरहाको अर्नमा–९ मा मोटरसाइकलमा आएको हतियारधारीले गोली प्रहार गर्दा दुई जना गम्भीर घाइते भएका छन् ।
घाइतेहरु पनि मोटरसाइकलमा सवार थिए । गोली लागेर घाइते हुनेमा मझौलीया ४ का चुल्हाई यादव र सोही ठाउँका लक्ष्मेश्वर साह छन् । उनीहरुलाई उपचारका लागि धरान लगिएको छ ।
पूर्व पश्चिम राजमार्गबाट सदरमुकाम सिरहा जोड्ने बाटोमा उक्त घटना भएको हो ।
स १ प १५५ नम्बरको मोटरसाइकलमा घरबाट सिरहा सदरमुकाम आइरहेका यादव र साहलाई पछाडिबाट गोली हानिएको थियो ।
मोटरसाइकलमा आएका ३ जनाको अपरिचित समूहले गोली प्रहार गरेको एसपी पूर्णचन्द्र जोशीले जानकारी दिए । यादवको पेटमा र साहको ढाडमा गोली लागेको छ ।
घटनास्थलबाट गोलीको एउटा खोका र त्यसमा लाग्ने एउटा लिड बरामद भएको छ । यादव र साहको गाउँमा केही व्यक्तिसँग जग्गासम्बन्धी विवाद रहेकोले व्यक्तिगत रिस फेर्न सो घटना भएको हुन सक्ने आशंका गरिएको छ ।
घटना शंकास्पद भएकोले हरेक पक्षबाट छानबिन थालिएको एसपी जोशीले बताए ।
