यात्रु डराएपछि नयाँ विमानको पहिलो उडान रद्ध

काठमाण्डु, ११ असार– चीनबाट ल्याइएको विवादास्पद एमए–६० विमानको पहिलो उडान नै यात्रु डराएपछि रद्ध भएको छ । पहिलो उडानका लागि भद्रपुर तय भएकोमा त्यहाँको उडान रद्ध भएको छ।
त्यसैले आज बिहान ८ बजे विराटनगरका लागि भने सो विमानले उडान भर्ने भएको छ । त्यसमा पनि करिब ५२ जना यात्रु अट्ने विमानमा २५ यात्रु मात्रै उडान गर्दै छन्। उडानका लागि चाहिने एयरक्राफ्ट अपरेटिङ सर्टिफिकेट अर्थात् विमान सञ्चालन अनुमतिपत्र मंगलबार राति ८ बजे मात्रै दिइएको छ। आजको नेपाल समाचार पत्र दैनिकले समाचार छापेको छ ।
हवाई विभागको फ्लाइट सेफ्टी एन्ड स्ट्यान्डर डिभिजनका अधिकारीलाई अत्यधिक दबाब दिइएपछि राति सो प्रमाणपत्र दिइएको हो। लामो विवादका कारण विमानको सुरक्षामा जोखिम मोल्न डराउँदै यात्रुहरूले अझै पनि टिकट काट्न मानिरहेका छैनन्। यस्तै निगम व्यवस्थापनले विभिन्न चार स्थानको ग्राउन्ड ह्यान्डलिङ यती एयरलाइन्सलाई दिने तयारी गरेपछि कर्मचारी युनियनहरू आगो भएका छन्।
उनीहरूले कडा दबाब दिएपछि सो निर्णय फिर्ता लिई ग्राउन्ड ह्यान्डलिङको काम आफैंले गर्ने निगमले अन्तिम समयमा निर्णय गरेको छ। कर्मचारीहरूले कमिसनको चक्करमा सो निर्णय गर्न लागिएको भन्दै अख्तियार जाने चेतावनी दिएपछि व्यवस्थापन सो निर्णयबाट पछि हट्न बाध्य भएको हो।