- बिहीबार, १३ वैशाख, २०८१
सिरहा, ८ फागुन – नेपालमा गैरकानुनी रूपमा प्रयोग गर्दै आएका भारतीय एन्टेना तथा मोबाइल नियन्त्रणमा लिन इलाका प्रहरी कार्यालय लहानले अभियान चलाएको छ । अभियानका क्रममा लहान नगरपालिका–२ र ४ बाट आठ थान एन्टेना नियन्त्रणमा लिइएको छ ।
भारतीय नम्बरको मोबाइल नेपालमा प्रयोग गर्नु गैरकानुनी हो भन्दै सम्झाएर एन्टेना नियन्त्रणमा लिइएको इलाका प्रहरी कार्यालय लहानका प्रहरी निरीक्षक सन्तोष निरौलाले जानकारी दिए ।
‘आइन्दा भारतीय नम्बर प्रयोग गरेको देखिए कानुनबमोजिम कारबाही गर्ने चेतावनीसमेत दिएका छौँ,’ उनले भने । लहान नगरपालिकामा २०० भन्दा बढी सर्वसाधारणले एन्टेना राखेर भारतीय नम्बरको मोबाइल बोक्ने गरेको प्रहरीको दाबी छ ।
एन्टेना लगाएर भारतीय नम्बरको मोबाइल बोक्दा नेपाल सरकारको राजस्व छली हुने र नेपालमै बसेर धम्की दिनेजस्ता प्रवृत्ति पनि बढेपछि नियन्त्रणमा लिने अभियान चलाइएको प्रहरी निरीक्षक निरौलाले जानकारी दिए ।
