- शुक्रबार, ७ वैशाख, २०८१
महोत्तरी, १४ माघ – जलेश्वर नगरपालिका– ५ स्थित श्याम डिभिडी हाउसमा गएराति लाखौँको लुटपाट भएको छ । अज्ञात लुटेरा समूहले डिभिडी हाउसका सञ्चालक श्यामसुन्दर साहलाई कुटपिट गर्दै रु तीन लाख ५५ हजार लुटपाट गरी लगेको पीडितले बताएका छन् ।
राति ८ बजेतिर अचानक पसलमा पसेर लुटेरा समूहले पसलको काउन्टर, कम्युटर, मोबाइललगायतका सामान तोडफोड र साहलाई कुटपिट गर्दै लुटपाट मचाएको जिल्ला प्रहरी कार्यालय महोत्तरीले जनाएको छ ।
तीन जनाको समूहमा आएका लुटेराले सो पसलबाट ३० थान विभिन्न कम्पनीका मोबाइल, ३० थान मोबाइलका ब्याट्री, १५ हजारका एनसेल र एनटिसीका रिचार्ज कार्ड र एक लाख २० हजार नगद गरी रु तीन लाख ५५ हजारको लुटपाट गरेको जनाइएको छ ।
घाइते साहको उपचार जिल्ला अस्पताल जलेश्वरमा भइरहको छ । लुटेरा समूहको खोजतलास व्यापकरुपमा भइरहेको जिल्ला प्रहरी कार्यालय महोत्तरीले जनाएको छ ।
