- शनिबार, ८ वैशाख, २०८१
सोलुखुम्बु, १९ मङ्सिर–नेपालकै पर्यटकीय क्षेत्र सोलुखुम्बुको खुम्जुङस्थित चोलापास पूर्वधार अभावमा जोखिमपूर्ण बन्दै गएको छ ।
बाह्रै महिना हिउँले ढाकिरहने यो पासमा एरो बोर्डसमेत नहुँदा विदेशीले बाटो भुलेर ज्यानसमेत गुमाउने गरेका छन् । धेरै पर्यटक पुग्ने र बर्सेनि पर्यटकको ज्यान लिने चोलापास पूर्वाधार अभावमा झन–झन जोखिमपूर्ण बन्दै गएको हो ।
सोलुखुम्बुको प्रसिद्ध पर्यटकीयस्थल गोक्यो तालको भ्रमण पूरा गरी सगरमाथाको आधार शिवीरतिर जाँदा पार गर्नुपर्ने चोलापास पूर्वाधार अभावमा जोखिमपूर्ण बन्दै गएको हो । समुद्र सतहबाट पाँच हजार ४२० मिटरको उचाइमा रहेको सोलुखुम्बुकै खतरनाक मानिने चोलापासमा राम्रो बाटोघाटो नभएका कारण दिनानुदिन जोखिमपूर्ण बन्दै गएको हो
बाह्रै महिना हिउँले ढाकिरहने चोलापासमा बाटो देखाउने कुनै सङ्केत छैन भने बर्सेनि तापक्रम वृद्धिले भू–बनावट परिवर्तन भइरहँदा भएका बाटोघाटोको नाम–निशाना भेटिँदैन, ग्लेसियर पग्लिएर ठाउँ ठाउँमा पोखरी र खर्पस बन्न थालेपछि यस क्षेत्रको बाटो झन कठिन बनेको पर्यटन वयवसायी मिङमार शेर्पाले बताए ।
यसैका कारण चोलापास पार गर्ने क्रममा एक्लाएक्लै हिँड्ने कतिपय विदेशी नागरिक बर्सेनि हराउने गरेका छन् । साहसिक पर्यटकीय पदमार्गको नामले समेत चिनिने चोलापासमा भएको बाटो हिउँले पुर्ने वा हिउँ पग्लेर चलायमान हुने हुँदा पर्यटकहरू हराउने गरेका छन् ।
चोलापास पार गर्दा विभिन्न ठाउँमा भएका ढिस्काहरु छल्दै हिँड्नुपर्दछ । करिब आधा घण्टाभन्दा बढी समय हिउँले ढाकिएको अप्ठ्यारो बाटो अन्दाजको भरमा हिँड्नु निकै चुनौतीपूर्ण हुन्छ । चोलापासमा मात्र होइन चोलापास पार गरिसकेपछि पनि अप्ठ्यारो बाटो काट्नुपर्ने भएकाले यो पासलाई खतरनाक मानिएको टे«किङ व्यवसायी राम बम्जन बताउँछन ।
सगरमाथा आधार शिविर तथा कालापत्थरको यात्रा पार गरी गोक्यो ताल लगायतका क्षेत्र हेर्न चाहनेहरूले चोलापास गर्नैपर्छ वा गोक्यो क्षेत्रको भ्रमण सकेर आधार शिविर वा कालापत्थर जान चाहने हो भने पनि चोलापास पार गर्नैपर्छ ।
पर्यटकको समस्या समाधानका लागि ठाउँठाउँमा फलामको पोल गाडी डोरी टाँग्ने व्यवस्था मिलाउनुपर्ने टे«किङ व्यवसायीको भनाइ छ । रासस
