इस्लामाबाद, १८ कात्तिक–अमेरिकी चालकविहीन विमानको आक्रमणमा तालिवानका नेता हकिमुल्लाह मेहसुदको मृत्यु भएपछि सार्वजनिक रूपमा पहिलोपटक बोल्दै पाकिस्तानी प्रधानमन्त्री नवाज सरिफले सोमबार शक्तिको अर्थहीन प्रयोगले शान्ति प्राप्त गर्न नसकिने बताएका छन । पाकिस्तानी सरकारका प्रतिनिधिहरूले तेहरिक–ए–तालिवान पाकिस्तान (टीटीपी) सँग वार्ता गर्न तयारी गरिरहेको अवस्थामा शुक्रबार मेहसुद मारिएका थिए । यस घटनाप्रति इस्लामाबादले क्रुद्ध प्रतिक्रिया व्यक्त गरेको छ भने अफगान राष्ट्रपति हमिद करजईले यो आक्रमण अनुपयुक्त समयमा भएको बताएका छन ।
पाकिस्तानी गृहमन्त्री चौधरी निसारले शनिबार वासिङटनले डोन आक्रमण गरी शान्ति प्रयासलाई बिथोलेको आरोप लगाएका छन ।
सरिफले चालकविहीन विमानको आक्रमणका विषयमा प्रत्यक्ष रूपमा नबोले पनि आफूले शान्तिलाई मौका दिन चाहेको बताए ।
उनले आफ्नो सरकार रक्तपात तथा हिंसाको चक्रलाई अन्त्य गर्न दृढ रहेको बताए । उनले यी कुरा पञ्जाव प्रान्तको बहलपुर नजिकै सैनिक अभ्यासपछि सम्बोधनमा बताए ।
उनले मन्त्रिपरिषद्को सुरक्षा समितिको बैठक सोमाबार बस्ने र त्यसमा वासिङटनसँग इस्लामाबादको सम्बन्धको सबै पक्षमा पुनराबलोकन हुने बताए ।
अफगान नेता करजईले आफ्नो भनाइ काबुलको भ्रमणमा रहेका अमेरिकी संसदका प्रतिनिधिसमक्ष राखेका हुन ।
टीटीपीले अफगानको तालिवानभन्दा पृथक रूपमा काम गर्छ तर उसले एकै नेता मुल्लाह ओमारसँग प्रतिवद्धता व्यक्त गरेको छ ।
अफगान राष्ट्रपति करजईले पनि अफगान तालिवानसँग गत १२ वर्षको युद्ध अन्त्य गर्न वार्ता गर्न प्रयास गरिरहेका छन तर उनीसँग वार्ता गर्न यस इस्लामी लडाकू समूहले अस्वीकार गरेको छ ।
इमरान खानको नेतृत्वमा रहेको पाकिस्तान तेहरिक–ए–इन्साफ पार्टीको नेतृत्वमा विपक्षी दलहरूले सरकारलाई अफगानिस्तानमा नेटोको सेनालाई आवश्यक सामग्री आपूर्ति गर्न प्रयोग भएको पाकिस्तानबाट अफगानिस्तान पुग्ने मार्ग बन्द गर्न आग्रह गरेका छन् ।
यो दल उत्तरपश्चिमी प्रान्त खैबर पख्तुनख्वाको सरकारमा रहेकाले यसले उक्त मार्ग बन्द गर्ने बताएको छ । यसो गर्दा अफगानिस्तान पुग्ने प्रमुख मार्ग बन्द हुनेछ ।
सन् २०१२ मा अमेरिकी आक्रमणमा २४ जना पाकिस्तानी सैनिकको मृत्यु भएपछि पाकिस्तानले यस मार्गलाई बन्द गरिदिएको थियो ।
अफगानिस्तानमा १२ वर्षसम्म रहेपछि आउँदो वर्ष नोटोले त्यहाँ रहेका ८७ हजार सैनिकलाई फिर्ता लैजानेछ । यस सेनाका लागि पाकिस्तानी क्षेत्र भएर आउने आपूर्ति सामग्रीको महत्व अधिक रहेका बताइएको छ ।
पाकिस्तानमा अमेरिकाविरोधी भावना बलियो रहेको छ भने चालकविहीन विमानबाट आक्रमण निकै अलोकप्रिय रहेको छ । पाकिस्तानले यसले आफ्नो नागरिकको मृत्यु हुने गरेको र सार्वभौमसत्ता उल्लङ्घन भएको दाबी गरेको छ ।
टीटीपीले आफ्नो सर्वोच्च परिषद्का प्रमुख अस्मातुल्लाह सहिन भिटानीलाई आइतबार आफ्नो अस्थायी नेताको रूपमा छनौट गरेको छ ।
टीटीपीका दोस्रो स्थानका नेता खान सइदले मेहसुदको नजिकको मानिएका भिटानी यस समूहका लागि स्थायी प्रमुख हुनसक्ने धारणा व्यक्त गरेका छन् । रासस/एएफपी