- सोमबार, २२ असार, २०८३
इलाम, ४ पुस– उपभोक्ताबाट विद्युत् महसुल ठगी गर्ने एक मिटर रिडरलाई प्रहरीले पक्राउ गरेको छ । चिसापानीका उपभोक्ताबाट रु ६ लाख ठगी गरेको आरोपमा चिसापानी– ७ का टंकमणि लुइँटेललाई विहार प्रहरीले पक्रेको हो ।
लुइँटेलले तीन वर्षदेखिको मिटर रिडिङ गरेर नेपाल विद्युत् प्राधिकरण इलाम शाखामा नबुझाउने गरेको उपभोक्ताले थाहा पाएपछि उनीविरूद्ध जिल्ला प्रहरी कार्यालयमा उजुरी दिएका थिए । प्राधिकरणले विद्युत् महसुल संकलनका लागि उनलाई त्यस क्षेत्रमा खटाएको थियो ।
उनले उपभोक्ताबाट महसुल संकलन गर्ने तर त्यो महसुल प्राधिकरणमा नबुझाउने गरेका थिए । त्यस क्षेत्रका २३ जना उपभोक्ताले महसुल नतिरेर लाइन काट्ने अवस्थामा पुगेपछि लुइँटेलले महसुल उठाएर नतिर्ने गरेको रहस्य खुलेको हो ।
महसुल ठगी गर्ने लुइँटेलविरुद्ध ठगी आरोपमा मुद्दा दायर गरी अनुसन्धान प्रक्रिया अघि बढाएको जानकारी प्रहरी निरीक्षक यामबहादुर पौडेलले दिए ।
रासस
