- आइतबार, ३ साउन, २०८३
एजेन्सी- फिफा विश्वकप फुटबलमा इंग्ल्याण्डले फ्रान्सलाई ६–४ ले हराउँदै तेस्रो स्थान हासिल गरेको छ ।
प्रतिस्पर्धात्मक खेलमा इंग्ल्याण्डले पहिलो हाफमै बनाएको ठूलो अग्रतालाई अन्तिमसम्म जोगाउँदै विजयी बनेको हो ।
इंग्ल्याण्डको जितमा बुकायो साकाले ह्याट्रिक गरे । डेक्लन राइस र एज्री कोन्साले एक–एक गोल गर्दा जुड बेलिङ्घमले इन्जुरी समयमा अर्को गोल थपे ।
विश्वकपको नकआउट चरणमा ह्याट्रिक गर्ने उनी इंग्ल्याण्डका दोस्रो खेलाडी बनेका छन् । यसअघि सन् १९६६ को फाइनलमा जियोफ हर्स्टले यो उपलब्धि हासिल गरेका थिए ।
खेलको २० मिनेटभित्रै राइस र कोन्साले गोल गर्दै इंग्ल्याण्डलाई उत्कृष्ट सुरुआत दिलाएका थिए । त्यसपछि साकाले लगातार दुई गोल थपेपछि पहिलो हाफ ४–० को अग्रतासहित सकिएको थियो । सन् १९३० यता विश्वकपमा फ्रान्स पहिलो पटक पहिलो हाफमै चार गोलले पछि परेको हो ।
दोस्रो हाफमा फ्रान्सले पुनरागमनको प्रयास गर्यो । किलियन एम्बाप्पेले दुई तथा ब्राड्ली बारकोलाले एक गोल गर्दै खेललाई रोमाञ्चक बनाए। तर ८७औँ मिनेटमा पाएको पेनाल्टीलाई साकाले गोलमा परिणत गर्दै ह्याट्रिक पूरा गरे र इंग्ल्याण्डको जित लगभग सुनिश्चित गरे ।
इन्जुरी समयको छैटौँ मिनेटमा उस्मान डेम्बेलेले फ्रान्सका लागि अर्को गोल गरे पनि त्यसको दुई मिनेटपछि बेलिङ्घमले व्यक्तिगत कौशलमा उत्कृष्ट गोल गर्दै इंग्ल्याण्डलाई ६–४ को जित दिलाए ।
यो खेलसँगै फ्रान्सले विश्वकप इतिहासमा पहिलो पटक एउटै खेलमा ६ गोल बेहोरेको छ ।
सन् १९६६ पछि पहिलो पटक पुरुष विश्वकपमा तेस्रो स्थान हात पारेको इंग्ल्याण्डका लागि यो विदेशी भूमिमा हासिल गरेको अहिलेसम्मकै उत्कृष्ट विश्वकप नतिजासमेत बनेको छ ।
साथै, बेलिङ्घमले यस संस्करणमा सात गोल गर्दै एउटै विश्वकपमा इंग्ल्याण्डका पुरुष खेलाडीले गरेको सर्वाधिक गोलको कीर्तिमान पनि बनाए ।
