- आइतबार, १० साउन, २०८३
काठमाण्डू, १५ चैत– पूर्व गृहमन्त्री एवं कांग्रेस नेता रमेश लेखकलाई काठमाण्डू जिल्ला अदालतमा उपस्थित गराइएको छ । हिजो (शनिबार) बिहान भक्तपुरको कटुञ्जेस्थित निवासबाट पक्राउ परेका उनलाई प्रहरीले आज अदालत उपस्थित गराएको हो ।
भदौ २३ र २४ गतेको जेनजी आन्दोलनमा तीन प्रहरीसहित ७६ जनाको ज्यान गएको घटनामा जिम्मेवार ठहर गरी जाँचबुझ आयोगले तत्कालीन प्रधानमन्त्री केपी शर्मा ओली र तत्कालीन गृहमन्त्री लेखकलाई ज्यान मुद्दामा अनुसन्धान गर्न सिफारिस गरेको थियो । प्रहरीले ओलीलाई पनि शनिबार बिहानै पक्राउ गरिसकेको छ ।
ओलीलाई पनि आज अदालत उपस्थित गराइँदैछ । ओलीलाई स्वास्थ्य जाँचको लागि त्रिवि शिक्षण अस्पताल (टिचिङ अस्पताल) लगिएकोमा डाक्टरको सुझाव अनुसार त्यहीँ भर्ना गरिएको छ । लेखकलाई भने प्रहरीको दुई नम्बर गण महाराजगञ्जमा राखिएको छ ।
