- सोमबार, ११ साउन, २०८३
काठमाण्डू, २५ फागुन– गुल्मीको बडीगाड खोलामा माछा मार्ने क्रममा डुबेर बेपत्ता युवक मृत अवस्थामा फेला परेका छन ।
गुल्मीको मुसिकोट नगरपालिका–१ अरेवाका २१ वर्षीय दीपजंग दर्लामी खोलामा मृत अवस्थामा फेला परेको जिल्ला प्रहरी कार्यलय गुल्मीले जानकारी दिएको छ ।
प्रहरीका अनुसार दर्लामी शनिबार साँझ करिब ८ बजे सोही स्थानका ५६ वर्षीय डम्बर दर्लामीसँग माछा मार्न जाल बोकेर बडीगाड खोलातर्फ गएका थिए । डम्बर दर्लामी भने एक्लै घर फर्किएका थिए ।
दीपजंग भने नफर्किएपछि आइतबार प्रहरी चौकी पौदिअमराईमा उनका आफन्तले खबर गरेका थिए । सूचना प्राप्त भएपछि प्रहरी नायब निरीक्षक लखनलाल चौधरीको कमान्डमा तीन जनाको टोली खोजीका लागि खटेको थियो ।
स्थानीयको सहयोगमा खोजतलास गर्ने क्रममा मुसिकोट–१ उपल्लो राथेस्थित बडीगाड खोलामा डुबेको अवस्थामा शव फेला परेको प्रहरीले जानकारी दिएको छ ।
