- मंगलबार, ३० असार, २०८३
विराटनगर, ५ माघ–माओवादी केन्द्रका अध्यक्ष पुष्पकमल दाहाल प्रचण्डले काँग्रेस–एमाले गठबन्धन बनेकै दिनदेखि मुलुकको राजनीतिमा दुर्घटनाको खतरा मडारिएको बताएका छन् ।
विराटनगर विमानस्थलमा शुक्रबार साँझ सञ्चारकर्मीसँग कुरा गर्दै प्रचण्डले सरकार अप्राकृतिक, अपारदर्शी र असंवैधानिक ढंगबाट बनेको बताए ।
लोकतन्त्रमा संसदको पहिलो र दोश्रो दल मिलेर सरकार बन्नु नै गलत रहेको भन्दै उनले सरकारका ६ महिनाका गतिविधिले मुलुकलाई राजनीतिक दुर्घटनातर्फ लगेको बताए ।
संसद अधिवेशन छलेर समितिमा विचाराधीन रहेको विषयमा अध्यादेश ल्याएर सरकारले विधि उल्लंघन गरेको टिप्पणी उनको छ ।
प्रचण्डले अध्यादेश फिर्ता लिन र तत्काल संसद बोलाउन माग गरे ।
दुई तिहाईको सरकार भएको दाबी गर्नेले अध्यादेश ल्याउन छाडेर संसदीय प्रक्रियाबाट कानून बनाउने प्रक्रियामा जानुपर्ने उनको भनाइ छ ।
