देउवालाई उम्मदेवारी फिर्ता लिन गगन थापाको आग्रह

काठमाण्डु,५ पुस– कांग्रेस संसदीय दलको नेतामा संस्थापन इतर पक्षबाट उम्मेदवार दर्ता गराएका कांग्रेस महामन्त्री गगन थापाले उम्मदेवारी फिर्ता लिन पार्टी सभापति शेरबहादुर देउवालाई आग्रह गरेका छन् ।

आज सिंहदरबारस्थित दलको कार्यालयमा पुगेर उम्मेदवारी दर्ता गरेपछि थापाले आफ्ना प्रस्तावक र समर्थक नेताहरुलाई धन्यवाद दिएका छन् ।

उनको प्रस्तावकमा डा शेखर कोइराला छन् भने समर्थनमा उपसभापति धनराज गुरुङ, महामन्त्री विश्वप्रकाश शर्मा र केन्द्रीय सदस्य प्रदीप पौडेल छन् । उनीभन्दा अगाडि सभापति देउवाले आफ्नो उम्मेदवारी दर्ता गरेका थिए ।

महामन्त्री थापाले शान्त मनले सोच्न र आफ्नो उम्मेदवारी फिर्ता लिने ऐतिहासिक निर्णय लिन सभापति देउवालाई आग्रह गरेका छन् । उनले कांग्रेसका सांसदहरुलाई जनमतको सम्मान गर्न र परिर्वतनको पक्षमा उभ्याउन आग्रह गरेका छन् ।