कृषिमन्त्रीको खुलासाः मैले देखाएको थिएँ प्रधानमन्त्रीलाई भारतीय दूतावासको पत्र

काठमाण्डु, २७ असार– कृषिमन्त्री चक्रपाणि खनालले भारतीय दूतावासले फलफूल तथा तरकारीमा विषादी परीक्षण नरोक्न पठाएको दबाबमुलक पत्र आफूले प्रधानमन्त्री केपी ओलीलाई देखाएको खुलासा गरेका छन् ।

प्रधानमन्त्री ओलीले पत्रबारे आफूलाई कसैले जानकारी नगराउँदा फसेको भन्दै क्षमा मागेको भोलिपल्ट मन्त्री खनालको यस्तो दाबी आएको हो । नेकपा संसदीय दलको बैठकमा त्यसबारे सांसदहरुको प्रश्न उठाएपछि प्रधानमन्त्री ओली १७ असारमा दूतावासबाट पत्र नआएको दाबी गर्दै जथाभावी नबोल्न उल्छै सांसदलाई चेतावनी दिएका थिए । तर, सञ्चारमाध्यममा पत्र सार्वजनिक भएपछि प्रधानमन्त्री ओलीले बिहीबार आफूलाई झ्ुक्याइएका कारण गलत दाबी गरेको र त्यसबाट लज्जित हुनुपरेको भन्दै क्षमा मागेका थिए ।

खनालले प्रधानमन्त्रीलाई सम्बन्धित मन्त्रालय (परराष्ट्र) ले जानकारी नगराएको थाहा पाएपछि आफूले पत्र देखाएको बताए । खनालले पत्र आउँदा आफू उपत्यका बाहिर रहेको र पछि थाहा पाएर प्रधानमन्त्रीलाई देखाएको बताए । ‘मैले प्रधानमन्त्रीलाई थाहा रहेनछ भन्ने बुझेपछि उहाँलाई पत्र देखाएँ’,कालिमाटीस्थित फलफूल तथा तरकारी बजारको विषादी प्रयोगशाला निरीक्षणपछि सञ्चारकर्मीसँग खनालले भने, ‘पत्र हेरेपछि प्रधानमन्त्रीले मलाई त जानकारी नै दिएन भन्नुभयो ।’ पत्रको बोधार्थ भारतीइ दूतावासले कृषिसहित अन्य मन्त्रालयमा पनि पठाएको बताए ।