- बिहीबार, १९ असार, २०८२
काठमाण्डू, १९ असार– नेपाल प्रहरीको केन्द्रीय अनुसन्धान ब्यूरो (सीआईबी)ले ललितपुर महानगरपालिका–५ महालक्ष्मीस्थानमा कार्यालय रहेको मितेरी सहकारी ठगी प्रकरणमा पक्राउ परेका ज्योतिबहादुर भण्डारीसँग कनेक्सन भेटिएपछि अर्का एक व्यक्तिलाई पनि प्रहरीले पक्राउ गरेको छ ।
पक्राउ पर्नेमा धादिङको धुनीवेशी नगरपालिका–९ घर भएका सुवास खत्री रहेका छन । पक्राउ परेका भण्डारी र खत्रीलाई हिरासतमा राखेर सीआईबीले अनुसन्धान गरिरहेको छ । भण्डारीसँग कनेक्सन भेटिएपछि पक्राउ परेका खत्री भने अनलाइन फिसिङमार्फत हुने ठगीमा संलग्न रहेको सीआईबीका एक अधिकृतले जानकारी दिएका छन ।
सहकारीको रकम अपचलन गरेर फरार रहेका भण्डारी सहकारीका पदाधिकारीलाई पुनः ठगेका थिए । सहकारीको रकम तिर्ने भन्दै प्रलोभन देखाएर विदेशबाट भण्डारीले ठगी गरेको खुलेको छ । सहकारी ठगी गरी भागेर थाइल्यान्ड, मलेसिया, भियतनाम हुँदै कम्बोडियासम्म पुगेका भण्डारीले विदेशमै रहेका बेलामा मितेरी सहकारीका संस्थालाई अनलाइनमार्फत सम्पर्क गरी प्रलोभन (फिसिङ) मा पारी ठगी गरेको सीआईबीको अनुसन्धानमा खुलेको थियो ।
त्यही ठगीमा खत्री पनि जोडिएको पाइएपछि उनलाई पक्राउ गरिएको सीआईबीका प्रवक्ता तथा एसपी युवराज खड्काले जानकारी दिए । बर्दियाको बाँसगढी गाउँपालिका–७ का ४२ वर्षीय भण्डारीले आफूले हिनामिना गरेको सहकारीको रकम तिर्ने भन्दै विदेशमै रहेका बेला ३ करोड ४४ लाख ७४ हजार ३२० रुपैयाँ ठगी गरेका थिए ।
यही साढे तीन करोड ठगीमा खत्री जोडिएको सीआईबी स्रोतले जानकारी दिएको छ । यसरी ठगी गर्ने भण्डारी र खत्री दुवै सहकारीसँग प्रत्यक्ष रूपमा कुनै साइनो नभएका व्यक्ति हुन । सहकारीको महाप्रबन्धक रहेकी ज्योति गुरुङ (नेपाली कांग्रेसका उपसभापति धनराज गुरुङकी पूर्वपत्नी) मार्फत भण्डारीले मिटर ब्याजमा रकम लिएको स्रोतले जानकारी दिएको छ ।
उनीहरूबीच घनिष्ट सम्बन्ध बनेपछि ज्योतिले सहकारीको रकम अपचलन गरेर भण्डारीलाई दिने र उक्त रकम भण्डारीमार्फत क्रिप्टोमा लगानी गरी विदेश पुग्ने गरेको बताइएको छ । रकम अपचलन गरेपछि दुवै जना फरार भएर विदेश पुगेको र ज्योति गुरुङले नै मितेरी सहकारीका पदाधिकारीलाई भण्डारीसँग सम्पर्क गराएको पाइएको एक अधिकृतले जानकारी दिएका छन ।
आफूले लगेको रकम सबै उहाँ (ज्योतिबहादुर भण्डारी) ले तिर्नुहुन्छ भन्दै ह्वाट्स एपमार्फत सम्पर्क गराएकी थिइन् । पछि उल्टै भण्डारीले ठगेको सीआईबीका एक अनुसन्धान अधिकृतले जानकारी दिए । ज्योति गुरुङमार्फत मितेरी सहकारीका पदाधिकारीहरूसँग सम्पर्क भएपछि भण्डारीले अनलाइन फिसिङमा पारेर उल्टै ठगी गरेको गरेका थिए । त्यसका लागि खत्रीको प्रयोग गरेको खुलेको छ ।
ज्योति गुरुङले भनेअनुसार आफूले सहकारीलाई तिर्नुपर्ने सावाँ–ब्याजसहितको रकम १४ करोड ८१ लाख रुपैयाँ तिर्ने बताएका भण्डारीले केही दिनमै रकम हालेको भन्ने विश्वास सहितका कागजात संस्थाका पदाधिकारीलाई पठाएका थिए । मितेरी सहकारीका सचिव कृष्णबहादुर रानाको ग्लोबल आईएमई बैंकको इन्द्रचोकस्थित शाखामा ३३ करोड ११ लाख रुपैयाँ पार्सल गरी पठाएको छु भन्दै उनले ह्वाट्स एपमार्फत संस्थाका पदाधिकारीलाई बताएका थिए ।
त्यसका लागि टोकनको फोटो समेत पठाएर विश्वास दिलाउने काम गरेको पाइएको प्रहरी अनुसन्धानबाट खुलेको छ । तिर्नुपर्ने १४ करोड ८१ लाख रुपैयाँभन्दा बढी रकम पठाएको र रकम बुझ्नका लागि ट्याक्ससमेत तिर्नुपर्ने भन्दै पटक–पटक उल्टै रकम हाल्न लगाएर करिब ठगी गरेको पाइएको थियो ।
यसका लागि भण्डारीलाई नेपालबाट सहयोग गर्ने व्यक्ति खत्री रहेको पाइएको छ । यसरी ठगी गरेको उक्त रकम फेरि हुन्डीमार्फत विदेश पुगेको सीआईबीको अनुसन्धानले देखाएको छ । अहिले खत्रीमाथि ठगीमा म्याद लिएर अनुसन्धान अघि बढाइएको छ । भने हुन्डीमा पनि सीआईबीले आन्तरिक अनुसन्धान गरेको छ ।
