- मंगलबार, १२ साउन, २०८३
काठमाण्डू, १० फागुन– एमाले अध्यक्ष केपी ओलीले २१ फागुनमा तोकिएको प्रतिनिधिसभा निर्वाचन स्थगनको षड्यन्त्र भइरहेको दाबी गरेका छन् ।
झापाको दमकमा सोमबार आयोजित एक कार्यक्रममा ओलीले निर्वाचन तयारीमा राज्य कोषबाट अर्बौं रुपैयाँ खर्च भइसकेकाले कुनै पनि अवस्थामा पूर्वनिर्धारित समयमै निर्वाचन हुनुपर्ने बताए ।
एमालेले चुनाव जित्ने अवस्था आएपछि स्थगित गराउने प्रयास हुन थालेको उनको भनाइ थियो ।
‘हामी अब चुनाव होस् भन्ने पक्षमै छौं । चुनाव स्थगित हुन पनि सक्छ । चुनाव स्थगित गर्न धेरै प्रयास भइराखेका छन्’, ओलीले भने ।
उनले एमाले अलबलबिना चुनावको तयारीमा लाग्ने उल्लेख गरे ।
ओलीले राष्ट्रिय स्वतन्त्र पार्टी (रास्वपा) सानो भाँडोमा चर्को आगो बालेर उमालेको दुधजस्तै भएको टिप्पणी गरे ।
रास्वपा आधार नभएको जोडजामवाला पार्टी भएको टिप्पणी पनि ओलीको छ । चुनाव नजितिने भएपछि अरुको झण्डा जलाउने, अरुलाई अपमान तथा बेइज्जत गर्ने काममा रास्वपा लागेको आरोप लगाए ।
