डा. गोविन्द केसीले तोडे अनशन

धनगढी- चिकित्सा शिक्षा र स्वास्थ्य क्षेत्र सुधारका विभिन्न माग राख्दै धनगढीमा अनशनरत डा. गोविन्द केसीले सरकारसँग ७ बुँदे सहमति भएपछि आफ्नो अनशन तोडेका छन् ।

बिहीबारदेखि धनगढीस्थित कृष्ण मन्दिर धर्मशालामा अनशन सुरु गरेका केसीको स्वास्थ्य अवस्था कमजोर बन्दै गएपछि शनिबार उनलाई सेती प्रादेशिक अस्पतालको सघन उपचार कक्ष (आईसीयू) मा भर्ना गरिएको थियो ।

त्यसपछि शिक्षा, विज्ञान तथा प्रविधि मन्त्रालयका सचिव चूडामणि पौडेल नेतृत्वको सरकारी वार्ता टोली अस्पताल पुगेर केसी पक्षसँग छलफल गरेको थियो ।
सरकारको तर्फबाट स्वास्थ्य तथा जनसंख्या मन्त्रालयका सचिव डा. विकास देवकोटा, प्रधानमन्त्रीका स्वास्थ्य सल्लाहकार डा. जेपी अग्रवाललगायत अधिकारी पनि वार्तामा सहभागी थिए ।

दुवै पक्षबीच ७ बुँदे सहमति जुटेपछि डा. केसीले अनशन अन्त्य गरेका हुन् ।

उनले गौमुल गाउँपालिका–२ का चक्रबहादुर धामीको हातबाट जुस पिएर अनशन तोडे ।

धामी सेती प्रादेशिक अस्पतालमा उपचाररत ८ वर्षीय सुदिप कोइरालाका भिनाजु हुन्।

सहमतिअनुसार कैलालीको गेटास्थित शहीद दशरथचन्द स्वास्थ्य विज्ञान विश्वविद्यालयलाई सञ्चालनमा ल्याउने प्रक्रिया तीव्र बनाइने, आवश्यक पूर्वाधार र जनशक्ति व्यवस्थापन गरी शिक्षण अस्पताल तथा शैक्षिक कार्यक्रम सञ्चालनको तयारी अघि बढाइने भएको छ ।

यस्तै, राष्ट्रिय चिकित्सा शिक्षा ऐनको मर्मअनुसार चिकित्सा शिक्षालाई गैरनाफामुखी र व्यवस्थित बनाउने, चिकित्सा शिक्षा आयोगसँग सम्बन्धित विषयमा आवश्यक सुधार गर्ने, छात्रवृत्ति व्यवस्थालाई प्रभावकारी बनाउने, मापदण्डविपरीत सञ्चालन भएका मेडिकल कलेजको अनुगमन र नियमन कडाइका साथ गर्ने तथा यसअघि सरकार र डा. केसीबीच भएका सहमतिहरू कार्यान्वयनलाई निरन्तरता दिने विषय पनि सहमतिमा समेटिएका छन् ।
सहमतिपछि डा. केसीले अनशन अन्त्य गरेसँगै धनगढीमा जारी उनको आन्दोलन पनि स्थगित भएको छ ।