- मंगलबार, १२ साउन, २०८३
काठमाण्डू, ८ फागुन– रवि लामिछाने नेतृत्वको राष्ट्रिय स्वतन्त्र पार्टी (रास्वपा) का कार्यकर्ताले पूर्वराजा वीरेन्द्र शाहको सालिकमाथि उभिएर अपमानपूर्ण र अभद्र व्यवहारप्रति राष्ट्रिय प्रजातन्त्र पार्टी(राप्रपा) लुम्बिनी प्रदेशले गम्भीर ध्यानाकर्षण भएको बताएको छ ।
आज (शुक्रबार) प्रदेश सचिव राजेन्द्र अधिकारीले विज्ञप्ति जारी गर्दै उक्त कार्यको घोर भर्त्सना एव खेद प्रकट गरेको हो । कसैको आस्थामा असर पर्ने यस्तो खाले अराजकतापूर्ण व्यवहार सह्य नहुने भन्दै चेतावनी समेत दिएको छ ।
उक्त गतिविधिको सम्बन्धमा तत्काल रास्वपाले आफ्नो धारणा स्पष्ट पार्दै माफी माग्न राप्रपाले आग्रह समेत गरेको छ । यस्ता घटना फेरी नदोहोरिने प्रतिबद्धता गर्न समेत राप्रपाले अनुरोध गरेको छ ।
‘निर्वाचनमा मतदाताले निर्धक्क मतदान गर्न सक्ने वातावरण बनाउनु सबै जिम्मेवार पार्टीको दायित्व हुन्छ । तसर्थ स्वस्थ प्रतिस्पर्धाको वातावरण बनाउन र अन्य दललाई असर गर्ने कुनै कार्य नगर्न सबै दल तथा व्यक्तिहरूलाई समेत आग्रह गर्दछौँ, प्रदेश सचिव अधिकारीद्वारा हस्ताक्षरित विज्ञप्तिमा भनिएको छ ।
