- शनिबार, १३ असार, २०८३
काठमाण्डू, २९ साउन– चितवनको नारायणगढ–मुग्लिन सडकखण्ड अन्तर्गत तुइन खोला नजिकै एक भारतीय ट्रकमाथि ढुंगा खस्दा ३ जना घाइते भएका छन ।
घाइते हुनेमा ट्रक चालक भारतको ब्याङ्लोर बस्ने करिब ४५ वर्षीय मेगुप्रसाद, सोही ठाउँका २१ वर्षीय नहमान धुनियाँ र ट्रक चालकका छोरा १८ वर्षीय सयद अफिद रहेको जिल्ला प्रहरीकार्यलयले जनाएको छ ।
ट्रक चालक मेगुको टाउकोमा गम्भीर चोट लागेको प्रहरीले जानकारी दिएको छ । नारायणगढबाट काठमाण्डू आउँदै गरेको केए ४३–६८५६ नम्बरको भारतीय ट्रकमा सडकमाथिबाट बिहीबार दिउँसो ढुंगा खसेको थियो ।
घाइते तीनै जनालाई उद्धार गरी उपचारका लागि चितवनको भरतपुर अस्पताल पठाइएको प्रहरीले जनाएको छ । सडकमाथिबाट ढुंगा खस्दा ट्रकमा समेत क्षति पुगेको थियो ।
ट्रकमा क्षति पुगेका कारण केही समय सडक एकतर्फीमात्र सञ्चालनमा थियो । तर सडकमा खसेको ढुंगा हटाएर अहिले सडक दुईतर्फी सञ्चालनमा आएको प्रहरीले जानकारी दिएको छ ।
