- शनिबार, १३ असार, २०८३
काठमाण्डू, २७ साउन– नेकपा एकीकृत समाजवादीका अध्यक्ष माधव नेपाल र सम्मानित नेता झलनाथ खनालबीच एक–अर्काविरुद्ध सार्वजनिक रुपमा आारेप प्रत्यारोप नलगाउने भद्र सहमति भएको छ ।
एकीकृत समाजवादीको मुख्यालय आलोकनगरमा पार्टीका अरु नेताहरु सहित भएको छलफलमा एकअर्कालाई सार्वजनिक रुपमा आरोप प्रत्यारोप नलगाउन नेपाल र खनाल सहमत भएको बैठकमा सहभागी भएका एक शिर्ष नेताले जानकारी दिएका छन । ति नेताले भने, ‘पार्टीका नेताहरुले विधान र आचार संहिताभित्र रहेर बोल्नुपर्छ, त्यही कुरा भएको हो ।’
पूर्वप्रधानमन्त्रीहरु नेपाल र खनालले एकअर्कालाई पार्टी छोडेर जानसम्म भनेका थिए । नेता खनालले चार वर्षसम्म विद्रोह पुष्टि हुन नसकेको अन्तर्वार्ता दिएपछि नेपालले पार्टीबाट बिदा हुन सुझाव दिएका थिए ।
नेपालले सार्वजनिक रुपमै पार्टी छोडेर एमालेको सेवा गर्न भनेपछि खनालले पनि चिडिएका थिए । अहिलेसम्म जबज भनिरहेका माधव नेपाललाई उपयुक्त पार्टी एमाले नै भएको प्रतिक्रिया दिएका थिए ।
यसरी एकअर्काविरुद्ध आक्षेप लगाउने क्रम बढेर गएपछि नेताहरु बेदुराम भुसाल, प्रमेश हमाल, वरिष्ठ उपाध्यक्ष राजेन्द्र पाण्डे र महासचिव घनश्याम भूसालले माधव र झलनाथलाई छलफलमा राखिरहेका छन् ।
