- सोमबार, २९ वैशाख, २०८२
काठमाण्डू, २९ वैशाख– एमाले अध्यक्ष समेत रहेका प्रधानमन्त्री केपी शर्मा ओली र क्रान्तिकारी कम्युनिस्ट पार्टीका महासचिव मोहन बैद्यबिच भैरहवा विमानस्थलमा जम्काभेट भएको छ ।
प्रधानमन्त्री ओली २५६९ औँ बुद्धजयन्तीको अवसरमा लुम्बिनीमा आयोजित कार्यक्रममा भाग लिन आज काठमाण्डूबाट दिउँसो प्रस्थान गरेका थिए । महासचिव बैद्य दिवङ्गत आमाको अन्तिम कार्य सकेर काठमाण्डू फर्किने क्रममा विमानस्थलमा आराम गरिरहेका थिए । विमानस्थलमा बैद्यलाई देखेपछि ओलीले स्वास्थ्य लाभको कामना गरेको भान्जा प्रशान्त ओलीले जानकारी दिए ।
‘महासचिवज्यू विमानस्थलमा आराम गरिरहनुभएको थियो । लुम्बिनीको कार्यक्रममा भाग लिन आउनुभएका प्रधानमन्त्रीले देखेपछि भेटेर आमाको निधनमा दुःख व्यक्त गर्नुभयो । स्वास्थ्य लाभको कामना गर्नुभयो ।
अन्य कुनै कुरा भएन’ उनले भने । दाङको घोराही उपनगरपालिका–१५ स्थित रतनपुरमा ठाइँला छोरासँग बस्नुभएकी बैद्यका आमा जानकीदेवी उपाध्यायको वैशाख २४ गते १०० वर्षको उमेरमा निधन भएको थियो । बिरामी आमालाई भेट्न वैशाख २३ गते घोराही गएका बैद्य भर्खर काठमाडौँ आइपुगेका छन् । उनी लामो समयदेखि दमका रोगी छन् ।
