- शनिबार, २७ वैशाख, २०८२
मुख्यमन्त्री उमर अब्दुल्लाह
एजेन्सी– जम्मू–कश्मीरका राजौरी जिल्लामा पाकिस्तानद्वारा गरिएको गोलीबारीमा एक उच्च भारतीय अधिकारीको ज्यान गएको छ ।
घटनामा अतिरिक्त जिल्ला विकास आयुक्त राजकुमार थापाको ज्यान गएको अधिकारीहरुलाई उद्धृत गर्दै भारतीय सञ्चार माध्यमले जनाएका छन् । उनी नेपाली मुलका भारतीय रहेको बताइएको छ ।
जम्मू–कश्मीरका मुख्यमन्त्री उमर अब्दुल्लाहले सामाजिक सञ्जाल एक्समार्फत थापाको मृत्यु भएको पुष्टि गरेका छन् । उनले भनेका छन्, ‘राजौरीबाट एक अत्यन्तै दुखद समाचार आएको छ । हामीले जम्मू–कश्मीर प्रशासन सेवाका एक समर्पित कर्मचारी गुमाएका छौं । हिजो मात्र उनी उपमुख्यमन्त्रीसँगै जिल्लाको भ्रमणमा थिए र मेरो अध्यक्षतामा भएको अनलाइन बैठकमा पनि सहभागी भएका थिए ।’
पाकिस्तानतर्फबाट गरिएको गोलीबारीमा थापाको घरलाई लक्षित गरिएको थियो । सोही हमलामा उनको निधन भएको हो । गोलाबारीबाट भएको थप क्षतिबारे खुलाइएको छैन । पाकिस्तानी आक्रमणको तत्काल तत्काल जवाफ दिइएको भारतीय सुरक्षा फौजले जनाएको छ ।
भारतले पहलगाममा भएको आतंककारी हमलामा एक नेपालीसहित २७ को मृत्यु भएपछि पाकिस्तानविरुद्ध ‘अपरेशन सिन्दूर’ नामको कारबाही सुरु गरेको थियो । भारतको प्रतिकार गर्न पाकिस्तानले बुनयान–उल–मरसूसनामको जवाफी कारबाही थालेको छ ।
पाकिस्तानले भारतीय हवाई सेनाको अड्डाहरु र मिसाइल भण्डारण क्षेत्रलाई लक्षित गररी आक्रमण तीव्र पारेको छ ।
