गृहमन्त्री लेखकद्वारा सिमलताल दुर्घटना अध्ययन कार्यदल गठन

काठमाण्डु, ३१ असार–नवनयिुक्त गृहमन्त्री रमेश लेखकले नारायणगढ–मुग्लिन सडकखण्डको भरतपुर महानगरपालिका–२९ सिमलतालमा पहिरोले दुई बस त्रिशूलीमा बगाउँदा बेपत्ता घटना अध्ययन गर्न गृह मन्त्रालयले कार्यदल गठन गरेका छन् ।

लेखकले सोमबार पदबहाली ग्रहण गर्दै सिमलताल घटना अध्ययन गर्न कार्यदल गठनको निर्णय गरेका हुन् ।

गृह मन्त्रालयका सह–सचिव छवि रिजालको नेतृत्वमा गठिन ६ सदस्यीय कार्यदलमा नेपाल प्रहरी, सशस्त्र प्रहरी, सडक विभाग र राष्ट्रिय विपद जोखिम न्यूनीकरण तथा व्यवस्थापन प्राधिकरणका प्रतिनिधि सदस्य छन् ।

कार्यदललाई घटना अध्ययन गरी प्रतिवेदन बुझाउन १० दिनको समयसीमा तोकिएको छ । शुक्रबार दुईवटा बस त्रिशूलीमा बगाउँदा करिब ६ दर्जन यात्रु बेपत्ता छन् । हालसम्म ५ जनाको शव भेटिएको छ ।

मन्त्री लेखकले घटनाको कारण पत्ता लगाउने र त्यस्ता घटना दोहोरिन नदिने उपाय खोजी गर्नुका साथै पीडितका परिवारलाई राहत उपलब्ध गराउने विषय समेटेर प्रतिवेदन बुझाउन कार्यदललाई निर्देशन दिएका छन् ।

उनले प्राकृतिक प्रकोपका कारणले जनधनको क्षति भएकाले त्यसलाई उचित सम्बोधन गर्नु सरकारको प्राथमिकता भएको उल्लेख गरे ।

गृहमन्त्री लेखकले नेपाल प्रहरीको चौथो ‘क्राइम एक्सन प्लान’ समेत स्वीकृत गरेका छन् ।