- शुक्रबार, २६ वैशाख, २०८२
काठमाण्डु, ४ असोज– संसदको राज्य व्यवस्था तथा सुशासन समितिले मापदण्डविपरीत विशिष्ट व्यक्तिहरुको सुरक्षामा खटाइएका सुरक्षाकर्मी फिर्ता गर्न निर्देशन दिएको छ ।
समितिको बिहीबार बसेको बैठकले प्रहरी तथा सशस्त्र प्रहरीका पिएसओ, सवारी चालक र भान्छेलाइ १५ दिनभित्र फिर्ता गर्न सरकारलाई निर्देशन दिएको हो ।
भीभीआइपी तथा भीआइपीहरुलाई प्राप्त हुने सुविधा बाहेकका अन्य मापदण्डबिपरित राखिएका पिएसओ, सवारी चालक र भान्छे १५ दिनभित्र फिर्ता गरी साबिक दरबन्दी भएका स्थानमा खटाउन निर्देशन दिइएको समिति सभापति रामहरि खतिवडाले जानकारी दिए ।
यस्तै बैठकले मन्त्री, सचिव तथा अन्य सरकारी अधिकारीले नियमले पाउनुभन्दा बढी सवारी साधन प्रयोग गरेको भए पनि फिर्ता गर्न प्रधानमन्त्री तथा मन्त्रिपरिषद कार्यालय र गृह मन्त्रालयलाई निर्देशन दिएको छ ।
यस्तै बैठकले बिदाका दिन पनि अत्यावश्यक सरकारी कार्यालय खोल्ने निर्णय कार्यान्वयन गर्न निर्देशन दिइएको सभापति खतिवडाले बताए ।
