- बिहीबार, २६ असार, २०८२
जनकपुर, १७ भदौ– जनकपुरधाम उपमहानगरपालिका–१९ जमुनियाकी १८ वर्षीया सरस्वती यादवको रहस्यमय मृत्यु भएको छ ।
धनुषा प्रहरी प्रवक्ता डिएसपी वेदप्रसाद गौतमले यादव आइतबार अपराह्न मृत भेटिएको बताए । परिवारका सदस्यले भने कलबाट पानी लिन गएका बेला लडेर उनको मृत्यु भएको बताएका छन् ।
तर, प्रहरीले परिवारको दाबीलाई आशंकाका रुपमा हेरेको छ । स्थानीयले पनि सरस्वतीको शनिबार राति नै मृत्यु भएको आरोप लगाएका छन् । सरस्वतीको रक्तश्रावका कारण राति नै मृत्यु भएको छिमेकीको भनाइ छ ।
डिएसपी गौतमले पोष्टमार्टम रिपोर्ट आएपछि मात्र घटनाबारे बताउन सकिने उल्लेख गरे ।
