गोविन्द भट्टराई भन्छन्ः मैले मतदाताको विश्वास जित्न सकिन, स्वर्णिमले जित्नुभयो

तनहुँ, १२ वैशाख– आइतबार सम्पन्न उपनिर्वाचनमा तनहुँ–१ बाट पराजित काँग्रेस उम्मेदवार गोविन्द भट्टराईले राष्ट्रिय स्वतन्त्र पार्टी (रास्वपा) का डा. स्वर्णिम वाग्लेलाई बधाई दिएका छन् ।

वाग्ले फराकिलो मतान्तरले विजयी भएपछि भट्टराईले उनलाई बधाई दिएका हुन् । वाग्लेले ३४ हजार ४ सय ८० मत प्राप्त गर्दा निकटतम प्रतिद्वन्द्वी भट्टराईले २० हजार ९२ मत प्राप्त गरे । आफूले मतदाताको विश्वास जित्न नसकेको र वाग्लेले जितेको उनले बताए ।

भट्टराईले निर्वाचनमा सौहार्द प्रतिस्पर्धा भएको उल्लेख गरे । ‘प्रिय स्वर्णिमजी, सर्वप्रथम तनहुँ–१ बाट प्रतिनिधिसभा सदस्यका रुपमा निर्वाचित हुनु भएकोमा हार्दिक बधाई । चुनावी यात्राका दौरानमा हामीबीच सौहार्द प्रतिस्पर्धा रह्यो,’ उनले सामाजिक सञ्जालमार्फत बधाई दिँदै भनेका छन्, ‘संयोगले तपाईं निर्वाचित हुनुभयो । मैले मेरा क्षेत्रका मतदाताको अपेक्षा पूरा गर्ने विश्वास दिलाउन सकिनँ, तपाइँले सक्नुभयो ।’

उनले आफूप्रति विकासका अपेक्षा राखेका मतदाताको विश्वास पनि अब वाग्लेकै अभिभारा बन्न पुगेको उल्लेख गरे । विगतमा आफूले पदको सपना नदेखे पनि क्षेत्रको विकासे अभियन्ताका रुपमा निरन्तर खटेको भन्दै अब पनि खटिरहने बताए ।

मतदाताको विकासे चाहना पूरा गर्ने अभियानमा वाग्लेलाई रचनात्मक सहयोग । खबरदारीपूर्ण साथ रहिरहने उनको भनाइ छ । मतदाताका धेरै ठूलो अपेक्षा र भरोसा रहेकाले पूरा गर्न र राजनीतिक यात्रामा अब्बल बन्न वाग्लेलाई शुभामना दिए ।