- शनिबार, ८ वैशाख, २०८१
काठमााण्डु,३० फागुन– ‘छक्का पञ्जा ४’ दुई साता अगाडिबाट सार्वजनिक प्रदर्शन आएको फिल्म हो । फिल्मले घरेलु बक्स अफिसमा आक्रामक कमाई गरिरहेको छ ।
स्वदेशमा मात्र होइन विदेशका पनि थुप्रै देशबाट प्रदर्शनमा आएको फिल्ममा रहेको सहकारी सम्बन्धी एउटा संवाद हटाउन माग गर्दै राष्ट्रिय सहकारी महासङ्घले हिजो सोमबार चलचित्र विकास बोर्डमा एउटा निवेदन बुझाएको छ ।
महासङ्घका अध्यक्ष मीनराज कँडेलद्वारा हस्ताक्षरित निवेदनमा सहकारी क्षेत्रको विश्वसनीयतामाथि नै प्रश्न उठाउने खालको संवाद फिल्ममा प्रयोग भएको भन्दै आपत्ति प्रकट गरिएको छ ।
‘छक्का पञ्जा ४’ मा सहकारी सम्बन्धी लाञ्छनायुक्त एवं नारी अस्मितामा खलल पुग्ने संवाद रहेकोमा समग्र सहकारी अभियानको तर्फबाट महासङ्घको गम्भीर ध्यानाकर्षण भएको छ’ निवेदनमा अगाडि भनिएको छ ‘सहकारी क्षेत्रको विश्वसनीयतामाथि प्रश्न उब्जिने उक्त कपोलकल्पित, भ्रामक, तथ्यहीन संवादको घोर भर्त्सना गर्दै भ्रम सिर्जना हुने उक्त संवाद तत्काल हटाउन अनुरोध गर्दछौँ । फिल्ममा महिलालाई भाग्ने सहकारीको रूपमा व्याख्या गरिएको संवाद छ ।
उक्त संवादप्रति सहकारी क्षेत्रका विभिन्न व्यक्तिहरूले आपत्ति जनाउँदै आएका छन् । हेमराज बिसीको निर्देशन रहेको फिल्ममा दीपक राज गिरी, बेनिशा हमाल, दीपाश्री निरौला, केदार घिमिरे, निर्मल शर्मा, बुद्धि तामाङ, राज आचार्य, सुश्मा निरौला, वेदना राईलगायत कलाकारको अभिनय रहेको छ ।
